فیصل آباد کے اقبال اسٹیڈیم میں کھیلے گئے میچ میں ڈولفنز کے خلاف اسٹالینز نے ٹاس جیت کر پہلے بیٹنگ کا فیصلہ کیا۔

76 رنز پر شان مسعود کے آؤٹ ہونے پر اسٹالینز کی جانب سے بیٹنگ کے لیے بابر اعظم کریز پر پہنچے۔

اس موقع پر سرفراز احمد نے کہا کہ ’ٹھیک ہے، ٹھیک ہے، جلدی نہیں ہے، بس ان لوگوں کو بولو کہ بابر، بابر کرتے رہیں، ہم بابر کو 40 اوورز کھلا دیں گے، باقی سارے آؤٹ ہو جائیں گے‘۔

تاہم، اسٹار بیٹر بابر اعظم نے 7 چوکوں اور 3 چھکوں کی مدد سے 100 گیندوں پر 104 رنز کی عمدہ اننگز کھیلی اور ان کی ٹیم نے مقررہ اوورز میں 7 وکٹوں کے نقصان پر ڈولفنز کو 272 رنز کا ہدف دیا۔

ڈولفنز کا آغاز انتہائی مایوس کن رہا اور دوسری ہی گیند پر محمد ہریرہ بغیر کوئی رن بنائے پویلین لوٹ گئے، اس کے بعد وقفے وقفے سے وکٹیں گرتی رہیں اور پوری ٹیم 25 اوور میں محض 97 رنز ہی بناسکی۔

اسٹالینز نے 174 رنز کے بڑے مارجن سے ڈولفنز کو شکست دے دی۔