کراچی کی سیشن عدالت میں انسانی اسمگلنگ اور دستاویزات میں ردو بدل کے کیس میں ملزم صارم برنی نے سیشن عدالت شرقی میں درخواست ضمانت دائر کردی۔

درخواست میں موقف اختیار کیا گیا ہے کہ 3 ماہ ہوگئے تاہم مقدمہ کا حتمی چالان عدالت میں جمع نہیں ہوا, ملزم عدالتی ریمانڈ پر جیل میں ہے اور مزید تفتیش کے لیے درکار نہیں۔

درخواست میں کہا گیا کہ دستاویز میں ردوبدل ممکن نہیں کیوں کہ تمام دستاویزات اب وفاقی تحقیقات ادارے (ایف آئی اے) کی تحویل میں ہیں۔

درخواست میں موقف اختیار کیا گیا کہ واصف شبیر نامی شخص نے بچیوں کا باپ ہونے کا دعویٰ کیا تاہم عدالت نے واصف شبیر کی بچیوں کی حوالگی کی درخواست خارج کردی تھی۔

درخواست میں مزید کہا گیا کہ عدالت نے اسے گارجین اور وارڈ کورٹ سے رجوع کرنے کی ہدایت کی تھی لیکن واصف شبیر نے اب تک متعلقہ عدالت سے رجوع نہیں کیا۔

درخواست گزار نے کہا کہ پراسیکیوشن خرید و فروخت کا کوئی بھی ثبوت پیش کرنے میں ناکام رہی ہے، تمام عوامل کو مدنظر رکھتے ہوئے ملزم ضمانت کا حقدار ہے۔

بعد ازاں، عدالت نے ملزم کی درخواست ضمانت پر سماعت کے 3 اکتوبر کی تاریخ مقرر کردی۔

واضح رہے کہ ایف آئی اے نے صارم برنی کو امریکا سے واپسی پر کراچی ایئرپورٹ سے گرفتار کیا تھا۔ ایف آئی اے ذرائع نے بتایا صارم برنی پر انتہائی سنگین نوعیت کے الزامات ہیں، کافی عرصے سے صارم برنی کی نقل و حرکت پر نظر رکھی جا رہی تھی۔