نجی ٹی وی چینل سما ٹی وی نے اپنے پروگرام میں دعویٰ کیا کہ ڈکی بھائی اور ان کی اہلیہ کو 8 اکتوبر کی صبح کو لاہور پولیس نے ان کی رہائش گاہ سے گرفتار کیا تھا۔

رپورٹ کے مطابق پولیس دونوں کو بحریہ ٹاؤن سے حراست میں لینے کے بعد تھانے لے آئی تھی اور ان سے تفتیش جاری ہے۔

ٹی وی چینل نے دعویٰ کیا کہ ڈکی بھائی اور ان کی اہلیہ کو سوشل میڈیا پر اسلحے کی نمائش کے علاوہ حکومت مخالف سلوگنز استعمال کرنے پر حراست میں لیا گیا۔

تاہم بعد ازاں پولیس نے ابتدائی تفتیش اور یوٹیوبر کی جانب سے تحریری معافی نامہ جمع کرانے کے بعد انہیں رہا کردیا۔

ایکسپریس ٹربیون کے مطابق ڈکی بھائی کو ماڈل ٹاؤن آرگنائزڈ کرائم یونٹ پولیس نے حراست میں لیا تھا اور ان پر الزام تھا کہ وہ سوشل میڈیا پر اسلحے کی نمائش کرتے ہیں۔

رپورٹ میں بتایا گیا کہ پولیس حراست میں ڈکی بھائی اور ان کی اہلیہ عروب جتوئی کی جانب سے تحریری طور پر معافی مانگے جانے کے بعد پولیس نے انہیں چھوڑ دیا۔

رپورٹ کے مطابق ڈکی بھائی اور ان کی اہلیہ کی جانب سے معافی مانگے جانے کے بعد ان کے خلاف کسی طرح کا کوئی مقدمہ دائر نہیں کیا گیا اور نہ ہی ان کے خلاف مزید کوئی کارروائی کی گئی۔

دوسری جانب ڈکی بھائی اور ان کی اہلیہ نے اپنی گرفتاری سے متعلق کوئی وضاحت جاری نہیں کی۔