سرکاری خبر رساں ادارے ’اے ایف پی‘ کی رپورٹ میں آل سندھ صرافہ جیولرز ایسوسی ایشن کے حوالے سے بتایا گیا کہ 24 قیراط فی تولہ سونے کے نرخ 7 ہزار روپے نیچے آ کر 2 لاکھ 70 ہزار 500 روپے ہو گئے۔

مزید بتایا گیا کہ 24 قیراط 10 گرام سونا 6 ہزار روپے سستا ہوا، جس کے بعد اس کی قیمت 2 لاکھ 31 ہزار 911 روپے ریکارڈ کی گئی ہے۔

ایسوسی ایشن کا کہنا تھا کہ 22 قیراط 10 گرام سونے کی قیمت 2 لاکھ 18 ہزار 85 روپے سے کم ہو کر 2 لاکھ 12 ہزار 584 روپے پر آ گئی ہے۔

ادھر، چاندی کی قیمت میں بھی تنزلی کا رجحان نظر آیا، جس کی فی تولہ اور 10 گرام قیمت 50 روپے اور 42.86 روپے گر کر بالترتیب 3 ہزار 250 اور 2 ہزار 786 روپے پر آ گئی ہے۔

ایسوسی ایشن نے رپورٹ کیا کہ عالمی منڈی میں فی اونس سونے کی قیمت 77 ڈالر تنزلی سے 2 ہزار 593 ریکارڈ کی گئی ہے۔

واضح رہے کہ گزشتہ روز سونے کی فی تولہ قیمت ایک ہزار 300 روپے کمی کے بعد 2 لاکھ 77 ہزار 500 پر آگئی تھی۔

24 قیراط فی تولہ سونا 1300 روپے تنزلی کے بعد 2 لاکھ 77 ہزار 500 روپے میں فروخت ہوا تھا۔

اسی طرح 24 قیراط 10 گرام سونے کے نرخوں میں ایک ہزار 115 روپے نیچے آ کر 2 لاکھ 37 ہزار 911 روپے ریکارڈ کی گئی تھی جبکہ 22 قیراط 10 گرام سونے کی قیمت کم ہو کر 2 لاکھ 18 ہزار 85 روپے پر آگئی تھی۔