پاک فوجی کے شعبہ تعلقات عامہ (آئی ایس پی آر) نے جاری بیان میں بتایا کہ خیبر ضلع کے علاقے باڑہ میں سیکیورٹی فورسز نے دہشت گردوں کی موجودگی کی خفیہ اطلاع پر کارروائی کی۔

آئی ایس پی آر کا کہنا تھا کہ آپریشن کے دوران فائرنگ کے تبادلے میں دہشت گرد حق یار آفریدی عرف خیبرے اور گلا جان مارے گئے۔

آئی ایس پی آر نے مزید کہا کہ دوسرے واقعے میں، سیکیورٹی فورسز نے افغانستان سے دراندازی کی کوشش ناکام بنا دی۔

پاک فوج کے شعبہ تعلقات عامہ کا کہنا تھا کہ شمالی وزیرستان میں پاک-افغان سرحد پر دراندازی کرنے والوں کے خلاف کارروائی کے دوران فائرنگ کے تبادلے میں ایک خارجی دہشت گرد ہلاک اور تین زخمی ہوگئے۔

آئی ایس پی آر نے کہا کہ سیکیورٹی فورسز دہشت گردی کے خاتمے کے لیے پرعزم ہیں، پاکستان کو توقع ہے کہ افغان عبوری حکومت اپنی ذمہ داریاں پوری کرے گی اور افغانستان کی سرزمین خوارج کی جانب سے پاکستان کے خلاف دہشت گردی کی کارروائیوں کے لیے استعمال ہونے سے روکے گی۔

مزید کہنا تھا کہ پاکستان تسلسل کے ساتھ افغان عبوری حکومت سے یہ مطالبہ کرتا آیا ہے کہ وہ اپنی سرحد کی طرف سے مؤثر بارڈر مینجمنٹ یقینی بنائے۔

صدر مملکت، وزیراعظم کی جانب سے خراج تحسین

ادھر، صدر مملکت آصف زرداری اور وزیراعظم شہباز شریف نے خوارج کے خلاف کارروائیوں میں سیکیورٹی فورسزکو خراج تحسین پیش کیا ہے۔

ڈان نیوز کے مطابق صدر مملکت آصف زرداری نے 3 خارجی دہشتگردوں کو ہلاک کرنے پر سیکیورٹی فورسز کی تعریف کی ہے، ان کا کہنا تھا کہ امن وامان خراب کرنے اور دراندازی کی کوششیں ناکام بنائیں گے۔

صدر آصف زرداری نے دہشت گردی کے خاتمے تک کارروائیاں جاری رکھنے کے عزم کا اعادہ کیا۔

دوسری جانب، وزیراعظم شہباز شریف نے بھی خیبرپختونخوا میں فتنہ الخوارج کے خلاف کامیاب آپریشنز پر سیکیورٹی فورسز کو خراج تحسین پیش کیا ہے۔

وزیراعظم کا کہنا تھا کہ انسانیت کے دشمنوں کے مذموم عزائم خاک میں ملاتے رہیں گے، دہشت گردی کے خلاف جنگ میں قوم سیکیورٹی فورسز کے ساتھ کھڑی ہے، دہشت گردی کے خاتمے تک جنگ جاری رہے گی۔