ڈان اخبار کی رپورٹ کے مطابق ای او سی کے کوآرڈینیٹر انعام الحق نے کہا کہ صوبے بھر میں پولیو ویکسی نیشن مہم 30 دسمبر سے شروع ہوگی۔

انہوں نے کہا کہ 16 دسمبر کو ہونے والے ایک اعلیٰ سطح کے اجلاس میں مہم کی تیاریوں کا جائزہ لیا گیا جس میں تمام اضلاع کے حکام نے شرکت کی۔ اجلاس کے دوران مشاہدہ کیا گیا کہ بلوچستان میں پولیو وائرس کی وسیع پیمانے پر موجودگی کے پیش نظر موثر مہم کو یقینی بنانے کے لیے مزید تیاری ضروری ہے۔

رواں سال اب تک پاکستان بھر سے رپورٹ ہونے والے 63 کیسز میں سے 26 (41 فیصد) بلوچستان میں، 18 خیبر پختونخوا میں، 17 سندھ میں، اور ایک ایک پنجاب اور اسلام آباد میں سامنے آئے ہیں۔

اجلاس میں نوٹ کیا گیا کہ مطلوبہ نتائج حاصل کرنے کے لیے کلیدی توجہ کے شعبوں میں مائیکرو پلاننگ، ٹیم ٹریننگ، اور کمیونٹی کے ساتھ رابطے کو بہتر بنانا شامل ہے۔

تاہم ذرائع کا کہنا ہے کہ ہیلتھ الائنس کی اپیل پر ہیلتھ ورکرز کی ہڑتال کے باعث پولیو مہم ملتوی کی گئی، ہیلتھ الائنس نے اعلان کیا تھا کہ وہ اپنے مطالبات کی منظوری تک ویکسی نیشن مہم میں حصہ نہیں لیں گے۔

ان کے مطالبات میں ڈاکٹروں اور شعبہ صحت کے دیگر عہدیداروں کی مستقل بنیادوں پر بھرتی، ہسپتالوں میں پبلک پرائیویٹ پارٹنرشپ کا خاتمہ اور ادویات، آلات اور دیگر طبی سہولیات کی فراہمی شامل ہیں۔

ذرائع کا کہنا ہے کہ ہیلتھ الائنس کے ارکان نے پولیو مہم کے شیڈول کے اعلان سے قبل ہی حکام کو دھمکی دی تھی کہ اگر ان کے مطالبات تسلیم نہ کیے گئے تو وہ تمام مہمات کا بائیکاٹ کریں گے۔