برطانوی نشریاتی ادارے ’بی بی سی‘ کے مطابق جنوبی افریقہ نے پاکستان کے خلاف سینچورین میں کامیابی حاصل کرنے کے بعد انگلینڈ میں ہونے والے فائنل میں جگہ بنائی۔

جنوبی افریقہ کو چیمپئن شپ کے فائنل میں رسائی حاصل کرنے کے لیے ایک جیت درکار تھی، فاتح ٹیم کی پوائنٹس ٹیبل پر پہلی پوزیشن برقرار ہے، لارڈز میں کھیلے جانے والے فائنل میں پروٹیز کا مقابلہ بھارت یا آسٹریلیا سے ہوگا۔

خیال رہے کہ جنوبی افریقہ پوائنٹس ٹیبل پر 11 میں سے 7 میچوں میں کامیابی حاصل کرنے کے بعد سرفہرست ہے۔

جنوبی افریقہ نے ورلڈ ٹیسٹ چیمپئن شپ 2025-2024 کا آغاز بھارت کے خلاف ایک، ایک سے برابر ہونے والے ہوم سیریز سے کیا تھا، اس کے بعد انہیں دورہ نیوزی لینڈ کے دوران کھیلے گئے 2 ٹیسٹ میچوں میں شکست ہوئی تھی۔

دورہ نیوزی لینڈ کے لیے جنوبی افریقہ نے اپنے ڈومیسٹک ٹی 20 ٹورنامنٹ کی وجہ سے ٹیم کے مرکزی کھلاڑیوں کی عدم دستیابی کے باعث ایک کمزور ٹیم کا انتخاب کیا تھا جس پر کافی تنقید کی گئی تھی۔

اس کے بعد اپنے کلیدی کھلاڑیوں کی واپسی کے ساتھ جنوبی افریقہ نے ایک ٹیسٹ ڈرا کیا جبکہ لگاتار 6 میں فتح حاصل کی۔

جنوبی افریقہ نے ٹیسٹ چیمپئن شپ کے دوران ویسٹ انڈیز، نیوزی لینڈ، بنگلہ دیش، سری لنکا اور پاکستان کے ساتھ سیریز کھیلی ہیں۔ فائنل میں رسائی حاصل کرنے کے بعد کپتان ٹیمبا باووما کا کہنا تھا کہ یہ نہ صرف میرے لیے بلکہ پوری ٹیم اور کوچ کے لیے بھی ایک بڑی کامیابی ہے۔

خیال رہے کہ جنوبی افریقہ نے آج (29 دسمبر) کو سنچورین میں کھیلے جانے والے ٹیسٹ میں دلچسپ مقابلے کے بعد پاکستان کو 2 وکٹوں سے شکست دی۔

جنوبی افریقہ کے شہر سنچورین میں کھیلے جارہے پہلے ٹیسٹ میچ کی پہلی اننگز میں پاکستان 211 رنز پر آؤٹ ہوئی اور جنوبی افریقہ نے پہلی اننگز میں 301 رنز بناکر 90 رنز کی برتری حاصل کی، دوسری اننگز میں قومی ٹیم 237 رنز پر آؤٹ ہوئی اور مہمان ٹیم کو جیت کے لیے 148 رنز کا آسان ہدف دیا۔

تاہم تیسرے دن کے اختتام پر قومی باؤلرز نے پروٹیز بلے بازوں کو خوب پریشان کیا اور دن کے اختتام تک 27 رنز پر ان کے 3 کھلاڑیوں کو پویلین واپس بھیج دیا۔ اوپنر ٹونی ڈی زورزی 2 رنز بناکر آؤٹ ہوئے، ریان ریکلٹن کھاتہ کھولے بغیر ہی پویلین واپس لوٹ گئے اور ٹرسٹن اسٹبز صرف ایک رن بنا سکے۔

کھیل کا چوتھا روز پاکستانی فاسٹ باؤلر محمد عباس کے نام رہا، چوتھے دن کا آغاز کرنے والے ایڈن مارکرم اور کپتان ٹمبا باؤما نے 43 رنز کی اہم شراکت قائم کی تاہم عباس نے پہلے مارکرم کو 37 اور پھر باؤما کو 40 رنز پر پویلین بھیج کر مہمان سائیڈ کی مشکلات میں اضافہ کیا۔

ڈیوڈ بیڈنگھم بھی 14 رنز بناکر محمد عباس کا ہی شکار بنے، کائل ویریننے 2 رنز بناکر اپنی وکٹ گنوا بیٹھے، پہلی اننگز میں 81 رنز کی اننگز کھیلنے والے کوربن بوش کھاتہ کھولے بغیر ہی پویلین واپس لوٹ گئے۔

جنوبی افریقہ کی جانب سے دسویں نمبر پر بیٹنگ کے لیے آنے والے فاسٹ باؤلر کگیسو ربادا نے 26 گیندوں پر 31 رنز کی اننگز کھیل کر پاکستان کی امیدوں پر پانی پھیر دیا اور مارکرو جانسن کے ساتھ ملکر اپنی ٹیم کو فتح سے ہمکنار کروایا۔

قومی ٹیم کی جانب سے محمد عباس نے 6، نسیم شاہ اور خرم شہزاد نے ایک ایک وکٹ حاصل کی۔