نادیہ خان نے حال ہی میں یوٹیوب پر مختصر ویڈیو شیئر کی، جس میں انہوں نے خواتین کو زائد العمری میں اپنی رنگت اور چہرے کا خیال رکھنے سمیت خوبصورت اور پرکشش نظر آنے کی ٹپس بھی بتائیں۔

اسی ویڈیو میں انہیں پہلے میک اپ کے بغیر اور بعد میں میک اپ کرنے کے بعد بھی دیکھا جا سکتا ہے۔

مذکورہ ویڈیو کے دوران نادیہ خان نے بتایا کہ انہوں نے حال ہی میں کہا تھا کہ جو خواتین چالیس کے پیٹے میں ہوتی ہیں، انہیں اپنے چہرے کو جاذب نظر رکھنے کے لیے کچھ کوششیں کرنی چاہئیے۔

اداکارہ کا کہنا تھا کہ ان کی بات کا مطلب غلط لیا گیا، جاہل لوگوں نے ان کی بات کو نہیں سمجھا اور کہنا شروع کردیا کہ نادیہ خان کی عمر چالیس سال ہے۔

ٹی وی میزبان نے واضح کیا کہ چالیس کے پیٹے کا مطلب چالیس سال نہیں ہوتا بلکہ اس کا مطلب 40 سے 49 سال تک ہوسکتا ہے۔

انہوں نے ان کی بات کا مطلب غلط سمجھنے اور ان کی عمر پر تبصرے کرنے والے افراد کے حوالے سے مزید کہا کہ کاش ایسے لوگ غائب ہو جائیں۔ کیونکہ ایسے لوگ جہاں ہوں گے گند پھیلائیں گے، فتنہ کریں گے، کیچڑ اچھالیں گے اس لیے انہیں نظر انداز کرنا چاہیے۔