اداکار نے سال 2024 کے اختتام پر ’بارڈر لیس ورلڈ‘ پروگرام کا ٹیزر جاری کرتے ہوئے اسے جلد متعارف کرانے کا اعلان کیا تھا اور اب انہوں نے پروگرام کا باضابطہ طور پر آغاز کردیا۔

عاطف اسلم کی جانب سے شروع کیے گئے گلوبل میوزیکل پروگرام ’بارڈر لیس ورلڈ‘ کی افتتاحی تقریب پنجاب کے دارالحکومت لاہور میں 3 جنوری کو ہوئی، جس میں متعدد شوبز و میوزیکل شخصیات نے شرکت کی۔

پروگرام کے دوران عاطف اسلم نے ’بارڈر لیس ورلڈ‘ پروگرام کے تحت جاری کیے گئے اپنے پہلے گانے ’پیراں‘ پر بھی پرفارمنس کی۔

گلوکار نے ’پیراں‘ کو اپنے یوٹیوب چینل پر بھی ریلیز کردیا، جس کی موسیقی بھی انہوں نے خود ترتیب دی ہے جب کہ شاعری بھی انہوں نے خود ہی لکھی ہے۔

’بارڈر لیس ورلڈ‘ کو متعارف کرانے کے حوالے سے انہوں نے میڈیا سے بات کرتے ہوئے بتایا کہ مذکورہ پروگرام کے تحت دنیا بھر کے نئے اور ابھرتے ہوئے گلوکاروں کے گانوں کو ریلیز کیا جائے گا۔

انہوں نے بتایا کہ اس بار ’بارڈر لیس ورلڈ‘ کا پہلا سیزن متعارف کرایا گیا ہے، جس کے تحت ابتدائی طور پر پروگرام کو زیادہ سے زیادہ ممالک اور فنکاروں تک پہنچایا جائے گا جب کہ دوسرے سیزن اور اگلے مرحلے میں دنیا بھر کے گلوکاروں کے گانوں کو متعارف کرایاجائے گا۔

عاطف اسلم کا کہنا تھا کہ ان کے خیال میں موسیقی کی کوئی سرحد یا ملک نہیں ہوتا، اس لیے انہوں نے پروگرام کا نام بھی سرحدوں کے بغیر والی دنیا رکھا ہے اور پروگرام کےتحت دنیا بھر کے گلوکار ایک ہی پلیٹ فارم پر اکٹھے ہوں گے۔

ابھی یہ واضح نہیں ہے کہ ’بارڈر لیس ورلڈ‘ کے پہلے سیزن میں عاطف اسلم کے علاوہ دیگر کون سے فنکاروں کے گانے ریلیز کیے جائیں گے اور اس کا دوسرا سیزن کب پیش کیا جائے گا۔