ڈان نیوز کے مطابق ڈاکوؤں نے پولیس یونفیارم میں ڈکیتی کی واردات کی، اس واردات کی سی سی ٹی وی فوٹیج منظر عام پر آگئی۔

فوٹیج میں دیکھا جاسکتا ہے کہ باغبانپورہ کے ڈینٹسٹ کلینک میں پولیس کی وردی پہنے ہوئے 2 ڈاکو داخل ہوئے اور اسلحہ کے زور پر 70 ہزار روپے نقد لوٹ لیے، مسلح ملزمان جاتے جاتے ایل سی ڈی بھی اتار کر لے گئے۔

سی سی ٹی وی فوٹیج میں ڈاکوؤں کے چہرے واضح ہیں، پولیس نے متاثرہ شہری آفاق کی مدعیت میں مقدمہ درج کر لیا۔

ملزمان کی فوٹیج موجود ہونے کے باوجود پولیس تاحال کسی بھی ملزم کا سراغ نہیں لگا سکی ہے۔

واضح رہے کہ پنجاب کے دارالحکومت میں جرائم کی وارداتوں میں اضافہ دیکھا جارہا ہے، آج صبح ہی لاہور پولیس کے آرگنائزڈ کرائم یونٹ ماڈل ٹاؤن نے کارروائی کرتے ہوئے چوری کی واردات میں ملوث 4 خواتین ملزمان کو گرفتار کرکے 60 لاکھ روپے نقد اور 30 لاکھ مالیت کی غیر ملکی کرنسی، جیولری اور موبائل فونز بر آمد کیے تھے۔

پولیس حکام نے بتایا تھا کہ گرفتار کی گئی خواتین میں ثنا، انعم، شہناز اور شیبا شامل ہیں جنہوں نے ماڈل ٹاؤن کے گھر میں چوری کی واردات کی تھی، جس کی رپورٹ درج کیے جانے کے بعد پولیس ٹیم نے لاہور، قصور اور ملتان کے مختلف علاقوں سے انہیں گرفتار کیا۔

گھریلو ملازمہ ثنا اور شہناز نے اپنی ساتھی خواتین انعم اور شیبا کی معاونت سے چوری کی واردات کامیابی سے انجام دی، ملزمہ ثنا زوجہ ہمایوں سابقہ ریکارڈ یافتہ نکلی تھی۔

سی سی پی او بلال صدیق کمیانہ نے ڈی ایس پی (او سی یو) فیصل شریف اورٹیم کو شاباش دیتے ہوئے پولیس ٹیم کے ارکان کو تعریفی سرٹیفکیٹس اور نقد انعام سے نوازا، ڈی آئی جی (آرگنائزڈ کرائم یونٹ) عمران کشور نے تقریب میں خصوصی شرکت کی تھی۔