راکھی ساونت نے بھارت کے متنازع ریئلٹی شو ’بگ باس‘ کے 15 ویں سیزن میں 2021 میں رتیش کمار کو اپنے شوہر کے طور پر متعارف کرایا تھا، بعد ازاں 2022 میں دونوں کے درمیان علیحدگی ہوگئی تھی۔

رتیش کمار سے علیحدگی کے بعد راکھی ساونت نے مسلمان ماڈل و اداکار عادل درانی سے شادی کرنے کا دعویٰ کیا تھا اور مسلمان اداکار نے بھی شادی کی تصدیق کی تھی۔

عادل درانی سے شادی کے بعد راکھی ساونت نے مذہب اسلام قبول کرنے کا دعویٰ بھی کیا تھا اور اپنا اسلامی نام فاطمہ بتایا تھا، تاہم جلد ہی مسلمان اداکار سے بھی ان کی شادی ختم ہوگئی۔

عادل درانی سے شادی کے بعد راکھی ساونت کی عمرے کی ادائیگی کی ویڈیوز بھی وائرل ہوئی تھیں اور بعد ازاں انہوں نے کسی مسلمان پاکستانی سے شادی کی خواہش ظاہر کی تھی۔

جنوری 2025 میں پاکستانی ادکار و ماڈل دودی خان نے راکھی ساونت کو انسٹاگرام ویڈیو میں شادی کی پیش کش کی تھی اور اداکارہ نے بھی ان کی پیش کش قبول کرلی تھی۔

بعد ازاں مفتی قوی نے بھی راکھی ساونت سے شادی کی خواہش ظاہر کی تھی اور راکھی ساونت نے ان کی پیش کش پر بھی مثبت رد عمل دیا تھا۔

راکھی ساونت کو پاکستانی مردوں کی جانب سے شادی کی پیش کش پر اداکارہ کے سابق شوہر رتیش کمار تلملا اٹھے اور انہوں نے مفتی قوی سمیت دودی خان کے لیے دھمکی آمیز ویڈیوز جاری کردیں۔

رتیش کمار نے متعدد ویڈیوز میں دودی خان اور مفتی قوی کو مخاطب ہوتے ہوئے انہیں پیغام دیا کہ وہ راکھی ساونت سے شادی کرنے سے باز رہیں، اداکارہ کو وہ سنبھال نہیں پائیں گے۔

رتیش کمار نے انسٹاگرام پر جاری کردہ ویڈیوز میں بتایا کہ راکھی ساونت بھارت کی رانی ہیں، دودی خان اور مفتی قوی اداکارہ کے لیول تک نہیں پہنچ سکتے، وہ ان سے دور رہیں۔

ایک ویڈیو میں رتیش کمار نے مفتی قوی کو خبردار کیا کہ وہ راکھی ساونت سے دور رہیں اور وہ انہیں قندیل بلوچ نہ سمجھیں۔

راکھی ساونت کے سابق شوہر نے واضح کیا کہ وہ پاکستان یا پاکستانیوں کے خلاف نہیں ہیں، وہ صرف دودی خان اور مفتی قوی جیسے لوگوں کو خبردار کر رہے ہیں کہ وہ راکھی ساونت سے دور رہیں۔

اداکارہ کے سابق شوہر کی جانب سے پاکستانی اداکار دودی خان اور مفتی قوی کو دھمکیاں دینے کی ویڈیوز وائرل ہوگئیں اور لوگوں نے اس پر دلچسپ تبصرے بھی کیے۔