اسٹار جوڑی کی شادی کی خبر عام ہونے کے بعد سے دونوں کے مداح اپنے پسندیدہ اداکاروں کے شادی کے بندھن میں بندھنے کے منتظر ہیں۔

چند روز قبل ڈھولکی کی تقریب سے شادی کی تقریبات کا باقاعدہ آغاز ہوچکا ہے، جس پر سوشل میڈیا صارفین نے نیک خواہشات کا اظہار بھی کیا تھا۔

تاہم، گزشتہ روز’ٹیم برائیڈ’ اور ’ٹیم گروم‘ کے درمیان والی بال کا میچ کھیلا گیا، جس کی تصاویر اور ویڈیوز اداکاروں نے انسٹاگرام پر شیئر کیں۔

ڈھولکی کی تقریب ہی کی طرح گیم نائٹ کی تصاویر پر بھی سوشل میڈیا صارفین میں خاصی مقبول ہو رہی ہیں۔

دلچسپ بات یہ ہے کہ اداکاروں کے انڈسٹری سے تعلق رکھنے والے دوست شادی کی مرکزی تقریب سے قبل دیگر تقریبات کا اہتمام کرتے نظر آرہے ہیں۔

اس سے قبل اداکارہ مومل شیخ نے ڈھولکی کا اہتمام کیا تھا، جب کہ اب اداکارہ سبینا سید اور اداکار خاقان شاہنواز نے گیم نائٹ کا اہتمام کیا ہے۔

گیم نائٹ کی تصاویر میں دیکھا جا سکتا ہے کہ ہونے والے دلہا اور دلہن سمیت دیگر فنکار بھی کتنے خوش اور خوب ہلّہ گلّہ کررہے ہیں۔

دوسری جانب، میچ کے اختتام کے بعد ایک ویڈیو میں دلہنیا کبریٰ خان افسردگی کا اظہار کرتی نظر آرہی ہیں،جس سے معلوم ہوتا ہے کہ ’ٹیم برائیڈ‘ کو دلہے کی ٹیم نے شکست دے دی۔

یاد رہے کہ اداکارہ کبریٰ خان اور اداکار گوہر رشید کی شادی کی چہ مگوئیوں کے حوالے سے ایک شوبز ویب سائٹ دعویٰ کر چکی ہے کہ دونوں سعودی عرب میں نکاح کریں گے، تاہم کس شہر میں نکاح ہوگا اس بات کا خلاصہ نہیں کیا گیا۔