ڈان نیوز کے مطابق عدالت عظمیٰ میں جسٹس امین الدین خان کی سربراہی میں 7 رکنی آئینی بینچ نے سماعت شروع کی، تو معاون وکیل رانا وقار نے آگاہ کیا کہ سپریم کورٹ آنے کے لیے صرف مارگلہ روڈ والا ایک ہی راستہ کھلا ہوا ہے، سلمان اکرم راجا ٹریفک میں پھنسنے کے سبب نہیں پہنچ سکے۔

جسٹس جمال مندوخیل نے کہا کہ خواجہ حارث صاحب پہنچ گئے، آدھا گھنٹہ پہلے نکل آتے تو اس وقت سپریم کورٹ میں ہوتے، لگتا ہے وکلا چاہتے ہیں لوگ قید میں سڑتے رہیں۔

بعد ازاں عدالت نے مزید سماعت کل تک ملتوی کر دی۔

واضح رہے کہ اسلام آباد میں وکلا کے احتجاج کے پیش نظر ریڈ زون کے گرد سیکیورٹی سخت کردی گئی تھی، اور ریڈ زون میں داخلے کے راستے محدود کر دیے گئے تھے۔

ریڈ زون میں داخلے کے لیے صرف مارگلہ روڈ کھلا ہوا ہے، دیگر راستوں پر رکاوٹیں کھڑی کی گئی ہیں۔

آج اسلام آباد میں سرکاری ملازمین کی جانب سے بھی پارلیمنٹ ہاؤس کے باہر دھرنے کا اعلان کیا گیا تھا، تاہم احتجاج سے قبل ہی حکومت اور سرکاری ملازمین کی قیادت کے درمیان مذاکرات کامیاب ہوگئے تھے۔