ٹیکنالوجی ویب سائٹ کی رپورٹ کے مطابق گوگل میسیج پر ایک نئے فیچر کی آزمائش کی جا رہی ہے، جس کے تحت صارفین میسیج سروس پر رہتے ہوئے واٹس ایپ پر کال کر سکیں گے۔

مذکور فیچر کے تحت جیسے ہی کوئی صارف کسی دوسرے صارف کو میسیج کر رہا ہوگا تب میسیج کے اوپر ویڈیو آئیکون کے ساتھ واٹس ایپ کا آئیکون بھی نظر آئے گا۔

مذکورہ آئیکون کو کلک کرتے ہی صارف دوسرے صارف کے نمبر پر واٹس ایپ کال پر منتقل ہوجائے گا، تاہم ایسا ہونے کے باوجود وہ گوگل کے میسیج پر ہی رہے گا۔

فیچر کے تحت کال ختم ہونے کے بعد صارف گوگل میسیج پر ہی رہے گا اور یہ فیچر اس وقت ہی کام کرے گا جب دونوں صارفین کے واٹس ایپ اکاؤنٹ بنے ہوئے ہوں گے۔

مذکورہ فیچر پر ابھی گوگل کے ماہرین کام کر رہے ہیں، اس پر کام مکمل ہونے کے بعد اس پر آزمائش شروع کی جائے گی، جس کے بعد اسے پیش کیے جانے کا امکان ہے۔

ممکنہ طور پر مذکورہ فیچر کو رواں برس ہی پیش کیا جائے گا، تاہم اس حوالے سے کچھ بھی کہنا قبل از وقت ہے۔

یہاں یہ بات بھی یاد رہے کہ حالیہ چند سالوں میں جہاں فون میسیجز کے استعمال میں کمی واقع ہوئی ہے، وہیں گوگل نے میسیج سروس کو بھی جدید فیچرز سے لیس کردیا ہے۔

اب صارفین میسیج سروس کے ذریعے بھی تصاویر اور ویڈیوز کا تبادلہ کر سکتے ہیں اور گوگل میسیج کی سروس ایک طرح سے واٹس ایپ میسینجر کی طرح استعمال کی جا سکتی ہے۔

گوگل نے کچھ سال قبل ہی شارٹ میسیجنگ سروس (ایس ایم ایس) کو رچ کمیونیکشن سروس (آر سی ایس) انٹرنیٹ ٹیکنالوجی میں تبدیل کیا تھا، جس کے تحت اسے واٹس ایپ کی طرح بھی استعمال کیا جا سکتا ہے۔

ایس ایم ایس کو آر سی ایس ٹیکنالوجی پر اینڈرائیڈ اور آئی او ایس فونز پر ہی استعمال کیا جا سکتا ہے، تاہم عام بٹن فونز جو کہ انٹرنیٹ چلانے کے فیچر فراہم کرتی ہوں، ان پر بھی آر سی ایس کو استعمال کیا جا سکتا ہے۔