آئی سی سی چیمپئنز ٹرافی کی رنگا رنگ کرٹن ریزر تقریب لاہور قلعہ کے دیوان عام میں ہوئی، جس میں چیف ایگزیکٹیو آفیسر آئی سی سی، چیئرمین پی سی بی، چیمپئنز ٹرافی کے ایمبیسیڈرز نے شرکت کی۔

تقریب میں 2017 کی چیمپئنز ٹرافی کے فاتح اسکواڈ سمیت کئی اہم ملکی اور غیر ملکی شخصیات نے شرکت کی، ایونٹ میں کرکٹ لیجنڈز کے پینل ڈسکشن بھی ہوئی جب کہ آتش بازی کے مظاہرے نے سماں باندھ دیا۔

چیمپئنز ٹرافی کی تقریب میں وزیرکھیل پنجاب فیصل ایون کھوکھر، اسپیکر پنجاب اسمبلی ملک محمد احمد خان بھی شریک ہوئے۔

2017 چیمپئنز ٹرافی کی فاتح اسکواڈ کے کھلاڑیوں میں محمد عامر، جنید خان، حارث سہیل، عماد وسیم، شاداب خان، وہاب ریاض، حسن علی، اظہر علی بھی تقریب میں موجود تھے۔ْ

چیمپئنز ٹرافی کے رواں ایڈیشن کے برانڈ ایمبیسڈرز اور پاکستان کو واحد چیمپئنز ٹرافی جتوانے والے کپتان سرفراز احمد کے علاوہ، جنوبی افریقہ کے جے پی ڈومینی اور نیوزی لینڈ کے ٹم ساؤتھی خصوصی گاڑی میں بیٹھ کر دیوان عام میں پہنچایا گیا۔

چیئرمین پی سی بی نے چیمپئنز ٹرافی کو کامیاب بنانے کے عزم کا اظہار کیا، تقریب سے خطاب میں ان کا کہنا تھا کہ پوری دنیا کی نظریں اس ایونٹ پر ہیں جب کہ پاکستان مکمل طور پر تیار ہے، انہوں نے تعاون کرنے پر سیکیورٹی ایجنسیز، پنجاب اور سندھ حکومت کا بھی شکریہ ادا کیا۔

آئی سی سی کے چیف ایگزیکٹیو آفیسر نے پاکستان کے جانب سے چیمپئنز ٹرافی کے لیے کیے گئے اقدامات پر اطمینان کا اظہار کرتے ہوئے قذافی اسٹیڈیم کے 117 دنوں میں تیار ہونے پر حیرانگی ظاہر کی۔

قومی ٹیم کے سابق کپتان سرفراز احمد نے امید ظاہر کی کہ پاکستان ایک بار چیمپئنز ٹرافی جیتنے میں کامیاب ہوگا۔

تقریب کے دوران گلوکاروں نے سُروں کا بھی جادو جگایا، رنگا رنگ تقریب کے اختتام پر آتش بازی کے شاندار مظاہرے نے سماں باندھ دیا۔