چیمپئنز ٹرافی 2025 کے آغاز سے ایک روز قبل آج کراچی میں پریس کانفرنس سے خطاب کرتے ہوئے محمد رضوان کا کہنا تھا کہ چیمپئنز ٹرافی میں جیت کے لیے محنت کر رہے ہیں، ٹیم کا مورال بلند ہے اور کوشش کریں گے کہ سابقہ غلطیوں سے سبق سیکھیں۔

انہوں نے کہا کہ میری ٹیم کا ہر کھلاڑی کپتان ہے، میں صرف ٹاس کرنے یا میڈیا سے بات کرنے کے لیے سامنے آتا ہوں تاہم، ہماری ٹیم میں ہر ایک کھلاڑی کی رائے کا حترام کیا جاتا ہے۔

انہوں نے کہا کہ چیمپئنز ٹرافی کے لیے زوروشور سے تیاریاں جاری ہیں اور ہم جیت کے لیے پُرعزم ہیں۔

واضح رہے کہ پاکستان اور نیوزی لینڈ کی کرکٹ ٹیموں کے درمیان کل (بدھ کو) چیمپئنز ٹرافی کا پہلا میچ نیشنل بینک اسٹیڈیم کراچی میں کھیلا جائے گا۔

محمد رضوان نے پریس کانفرنس میں مزید کہا کہ بطور ٹیم ہم میں کچھ کمیاں ہیں جنہیں دور کرنے کی کوشش کر رہے ہیں۔

بابر اعظم کے حوالے سے ان کا کہنا تھا کہ وہ سینئر کھلاڑی ہیں، آنے والے میچز میں وہی اوپننگ کریں گے۔

قومی ٹیم کے کپتان نے پروفیشنل ازم کا ذکر کرتے ہوئے کہا کہ ہمیں اس شعبے میں بہتری کی ضرورت ہے۔

انہوں نے مزید بتایا کہ چیمپئنز ٹرافی میں جیت کے لیے محنت کر رہے ہیں، ٹیم کا مورال بلند ہے اور کوشش کریں گے کہ سابقہ غلطیوں سے سبق سیکھیں۔

ایک سوال پر ان کا کہنا تھا کہ ٹیم کے سینئر کھلاڑیوں پر زیادہ ذمہ داری عائد ہوتی ہے جس کا انہیں مظاہرہ کرتے ہوئے اچھی کارکردگی دکھانی چاہیے۔