سوشل میڈیا پر وائرل ہونے والی ویڈیو ایک سال پرانی ہے، تاہم اب ویڈیو سوشل میڈیا پر وائرل ہوگئی۔

مذکورہ ویڈیو پنجاب کے دارالحکومت لاہور میں نشو بیگم کے اعزاز میں رکھی گئی ایک تقریب کی ہے، جس میں اداکارہ نے ڈانس کیا تھا۔

مذکورہ تقریب نشو بیگم کے فلمی کیریئر کے اعزاز میں رکھی گئی تھی اور اس میں انہوں نے اپنی 1970 کی دہائی میں ریلیز ہونے والی فلم ’رنگیلا‘ کے گانے پر ڈانس کیا تھا۔

وائرل ہونے والی مختصر ویڈیو میں نشو بیگم کو زائد العمری کے باوجود مرحوم اداکار سلطان راہی کے بیٹے حیدر سلطان کے ہمراہ ’وے سب توں سوہنیا‘ گانے پر رقص کرتے دیکھا جا سکتا ہے۔

نشو بیگم نے حیدر سلطان کے ہمراہ جس گانے پر ڈانس کیا، وہ گانا ’رنگیلا‘ فلم میں اداکارہ پر ہی فلمایا گیا تھا۔

نشو بیگم نے 54 سال بعد خود پر فلمائے گئے گانے پر دوبارہ ڈانس کرکے محفل لوٹی اور ان کی ویڈیو وائرل ہونے کے بعد صارفین نے ان کی تعریفیں کیں۔

’رنگیلا‘ فلم میں نشو بیگم نے ہیروئن جب کہ کامیڈین رنگیلا نے بطور ہیرو کردار ادا کیا تھا، فلم کی دوسری کاسٹ میں منور ظریف، صائقہ اور سلمٰی ممتاز سمیت دیگر اداکار شامل تھے۔

فلم کو کہانی سمیت ان کے گانوں کی وجہ سے پسند کیا گیا تھا جب کہ فلم کا گانا ’وے سب توں سوہنیا‘ آج بھی بڑے شوق سے سنا جاتا ہے۔

نشو بیگم نے اپنے اعزاز میں ہونے والی تقریب میں سلطان راہی کے بیٹے کے ہمراہ نصف صدی خود پر فلمائے گئے گانے پر ڈنس کرکے محفل لوٹی۔