ڈپٹی انسپکٹر جنرل (ڈی آئی جی) سی آئی اے مقدس حیدر نے بتایا کہ نوجوان مصطفیٰ عامر کے حالیہ قتل کے بعد ڈی ایچ اے میں کریک ڈاؤن جاری ہے، جبکہ ایک نوجوان اداکار کو گرفتار کیا ہے اور اس کی تحویل سے منشیات برآمد ہوئی ہے۔

سربراہ سی آئی اے نے کہا کہ پولیس نے ڈی ایچ اے کارروائی کرتے ہوئے نوجوان اداکار ساحر حسن کو گرفتار کیا اور اس کے گھر سے آدھا کلو منشیات برآمد کرلی۔

ان کا کہنا تھا کہ گرفتار ملزم مختلف چینلز کے ذریعے امریکا سے منشیات درآمد کرتا ہے، انہوں نے کہا کہ گرفتار اداکار شہر کے پوش علاقوں میں پارٹیوں کو منشیات سپلائی کرنے میں ملوث ہے۔

ڈی آئی جی مقدس حیدر نے وضاحت کی کہ ساحر حسن کو مصطفیٰ عامر قتل کیس کے سلسلے میں گرفتار نہیں کیا گیا بلکہ اس کیس کے بعد منشیات کے خلاف مہم کے دوران حراست میں لیا گیا۔

انہوں نے کہا کہ ایسے عناصر کے خلاف کریک ڈاؤن شروع کیا ہے، جو پوش علاقوں میں پارٹیوں اور تعلیمی اداروں کے طلبہ کو منشیات فراہم کرنے میں ملوث ہیں۔

مقدس حیدر کا کہنا تھا کہ گرفتار ملزم کے خلاف ایف آئی آر درج کی جا رہی ہے۔