ڈان نیوز کے مطابق دبئی میں فائنل سے قبل پریس کانفرنس کرتے ہوئے مچل سینٹنر نے کہا کہ بھارت کے خلاف کھیلنا بڑا چیلنج ہے، موجودہ حالات سے بخوبی آگاہ ہیں۔

انہوں نے کہا کہ ہم نے یہاں ایک میچ کھیلا ہے، کنڈیشن سےتھوڑی واقفیت ہے، ہمارے کچھ کھلاڑی نئے ہیں، پہلی بار انٹرنیشنل کرکٹ کونسل (آئی سی سی) کے ٹورنامنٹ کا فائنل کھیل رہے ہیں۔

مچل سینٹنر نے کہا کہ دبئی کی وکٹ سلو ہوگی، بہتر کھیل پیش کرنے کی کوشش کریں گے، ورون چکرورتی اور دیگر بھارتی اسپنرز کو کھیلنا کافی چیلنجنگ ہوگا۔

اُن کا کہنا تھا کہ نیوزی کے بیٹرز اسپنرز کو بہتر کھیلنے کی صلاحیت رکھتے ہیں، دبئی کی وکٹ پر 250 رنز بھی وننگ اسکور ہوسکتا ہے، فائنل کی پچ کا کچھ نہیں کہا جاسکتا۔

کیوی کپتان نے یہ بھی کہا کہ نیوزی لینڈ کے پیسر میٹ ہنری کے بارے میں فیصلہ کل میچ سے پہلے کیا جائے گا۔