خبر رساں ادارے ’ایسوسی ایٹڈ پریس‘ (اے پی) کے مطابق بوچ ولمور اور سنی ولیمز امریکا کے مقامی وقت کے مطابق 18 مارچ کی شب فلوریڈا کے ساحل پر پہنچے۔

دونوں خلابازوں کے ساتھ ایک امریکی اور روسی خلاباز بھی زمین پر واپس آئے ہیں۔

چار خلابازوں کو اسپیس ایکس کا ڈریگن کیپسول لے کر زمین پر پہنچا، انٹرنیشنل خلائی اسٹیشن پر پھنس جانے والے خلاباز جوڑے کے زمین پر اترنے کے مناظر کو امریکا کے نیشنل ایروناٹکس اینڈ اسپیس ایڈمنسٹریشن (ناسا) نے براہ راست دکھایا۔

دونوں خلابازوں کو زمین پر اترتے ہی اسٹریچر پر ڈال کر حفاظتی جگہ پر منتقل کردیا گیا اور دونوں نے پریس کانفرنس نہیں کی۔

عام طور پر خلا میں جانے والے خلاباز واپسی پر پریس کانفرنس کرتے ہیں، تاہم خلائی اسٹیشن پر 9 ماہ تک پھنس جانے والے خلابازوں نے زمین پر واپسی پر کوئی پریس کانفرنس نہیں کی۔

دونوں خلابازوں کو کافی کمزور حالت میں دیکھا گیا، تاہم ناسا حکام نے بتایا کہ دونوں خلاباز صحت مند ہیں لیکن انہیں زمین کی زندگی یا کشش ثقل کو اپنانے میں کچھ وقت لگے گا۔

بوچ ولمور اور سنی ولیمز جون 2024 میں بوئنگ کے اسٹار لائنر اسپیس کرافٹ کی اولین انسان بردار پرواز کے ذریعے خلائی اسٹیشن پہنچے تھے مگر خلائی جہاز میں فنی خرابی کے باعث وہ اسٹیشن پر ہی رکنے پر مجبور ہو گئےتھے اور اب انہیں 9 ماہ بعد زمین پر واپس لایا گیا۔