فواد خان اور وانی کپور نے اپنے انسٹاگرام پر فلم کا مختصر ٹیزر شیئر کیا، جس میں دونوں کو کار میں رومانوی انداز میں بیٹھے دیکھا جا سکتا ہے۔

مختصر ٹیزر میں فواد خان 1942 کے مقبول گانے ’کچھ بھی نہ کہو‘ کو گنگناتے دکھائی دیتے ہیں جب کہ وانی کپور رومانوی انداز میں انہیں دیکھتی نظر آتی ہیں۔

دونوں اداکاروں کو کار میں بیٹھے ہوئے دکھایا گیا ہے، ساتھ ہی فلم کو ریلیز کرنے کا اعلان بھی کیا گیا۔

مختصر ٹیزر میں وانی کپور اداکار سے پوچھتی ہیں کہ کیا وہ ان کے ساتھ ’فلرٹ‘ کر رہے ہیں، جس پر فواد خان بھی ان سے سوالیہ انداز میں پوچھتے ہیں کہ کیا وہ بھی ان کے ساتھ یہی کر رہی ہیں؟

مختصر دورانیے کے ٹیزر میں فلم کے صرف دو کرداروں کی جھلکیاں دکھائی گئی ہیں جب کہ اسے آئندہ ماہ 9 مئی کو ریلیز کرنے کا اعلان کیا گیا۔

فلم کی ٹیم کی جانب سے یہ واضح نہیں کیا گیا کہ فلم کو پاکستان میں بھی ریلیز کیا جائے گا یا نہیں، تاہم اعلان کیا گیا کہ فلم کو دنیا بھر کے سینماؤں میں پیش کردیا جائے گا۔

ممکنہ طور پر فلم کو پاکستان میں بھی ریلیز کیا جائے گا، تاہم ساتھ ہی خدشہ ظاہر کیا جا رہا ہے کہ اگر فلم کو پاکستان میں ریلیز کیا گیا تو بھارتی ہندو انتہاپسند اس کی انڈیا میں ریلیز پر تنازع کھڑا کر سکتے ہیں۔

فلم کی ہدایات آرتی ایس باگڑی نے دی ہیں جو کہ اس سے قبل بھی متعدد بولی وڈ فلموں کی ہدایات دے چکی ہیں۔

’ابیر گلال‘ کو متعدد افراد اور پروڈکشن ہاؤس پروڈیوس کر رہے ہیں اور اس میں وانی کپور کے علاوہ بھی تقریبا تمام کاسٹ بھارتی ہی ہیں۔

’ابیر گلال‘ کی کہانی دو ایسے افراد کے گرد گھومتی ہے جو کہ کسی بھی لالچ کے بغیر ایک دوسرے کی مدد کرتے ہیں، تاہم ان کے درمیان غیر ارادی طور پر محبت ہوجاتی ہے، جس کے بعد ان کی زندگی میں مسائل شروع ہوتے ہیں۔

ممکنہ طور فلم میں فواد خان اور وانی کپور کو دو مختلف ممالک، خطوں، علاقوں یا نسل سے دکھائے جانے کا امکان ہے، تاہم اس حوالے سے کچھ بھی کہنا قبل از وقت ہے۔

’ابیر گلال‘ کے ذریعے فواد خان 9 سال بعد بولی وڈ میں واپسی کریں گے جب کہ وہ پہلے پاکستانی اداکار بھی بنیں گے جو 2018 کے بعد کسی بولی وڈ فلم میں نظر آئیں گے۔

اس سے قبل فواد خان 2016 میں کپور اینڈ سنز اور اے دل ہے مشکل جیسی فلموں میں کام کر چکے ہیں، وہ سونم کپور اور انوشکا شرما جیسی اداکاروں کے ساتھ رومانس کر چکے ہیں۔

ماضی میں فواد خان ’اے دل ہے مشکل‘ اور ’خوبصورت‘ جیسی فلموں میں کام کر چکے ہیں۔

پاکستان اور بھارت کے درمیان 2019 سے کشیدگی کی وجہ سے دونوں ممالک میں ایک دوسرے کی فلموں کی نمائش سمیت ایک دوسرے کے منصوبوں میں اداکاروں کے کام پر بھی پابندی عائد ہے، تاہم بھارتی پنجابی فلموں میں پاکستانی اداکار کام کرتے رہے ہیں۔