امریکی حکومت نے قومی سلامتی کا خطرہ قرار دیتے ہوئے ٹک ٹاک کی امریکی سروسز کو کسی بھی امریکی شہری یا کمپنی کو فروخت کرنے سے متعلق قانون بنا رکھا ہے، اگر ٹک ٹاک کے امریکی آپریشنز مقامی فرد یا کمپنی کو فروخت نہیں کیے جاتے تو اسے امریکا میں بند کردیا جائے گا۔

مذکورہ قانون 20 جنوری 2025 کو نافذ العمل ہوچکا تھا لیکن نئے صدر ڈونلڈ ٹرمپ نے اس وقت ٹک ٹاک پر پابندی کے قانون کو 75 دن تک منسوخ کردیا تھا اور اب 5 اپریل کی شب تک 75 دن کی مدت مکمل ہوجائے گی۔

ڈونلڈ ٹرمپ کی جانب سے مدت بڑھائے جانے کے باوجود ٹک ٹاک کی فروخت کا معاملہ طے نہ ہوسکا اور اب 5 اپریل کو اس کے عارضی طور پر امریکا میں بند ہونے کے امکانات ہیں، تاہم ساتھ ہی خیال کیا جا رہا ہے کہ ڈونلڈ ٹرمپ ایک بار پھر اس پر پابندی کی مدت بڑھا دیں گے۔

امریکی نشریائی ادارے ’اے بی سی‘ نیوز کے مطابق 5 اپریل کو ڈونلڈ ٹرمپ کی جانب سے دی گئی مہلت ختم ہوجائے گی، جس کے بعد ممکنہ طور پر صدر دوبارہ مدت بڑھا دیں گے۔

دوسری جانب ٹک ٹاک کو دی گئی مہلت سے دو دن قبل ایمازون اور اونلی فینز سمیت دیگر ویب سائٹس اور کمپنیوں نے بھی ٹک ٹاک کی خریداری میں دلچسپی ظاہر کرتے ہوئے دستاویزات وائٹ ہاؤس بھجوا دیے ہیں۔

ابھی تک وائٹ ہاؤس کی جانب سے بھی کوئی ایسا اشارہ نہیں دیا گیاکہ ٹک ٹاک کی خرید و فروخت کا معاملہ طے ہونے کے قریب یا نہیں، تاہم امکان ظاہر کیا جا رہا ہے کہ 5 اپریل سے قبل امریکی حکومت ٹک ٹاک کی ممکنہ پابندی یا اس کی مہلت بڑھانے سے متعلق اعلان کرے گی۔