اونیجا اینڈریو رابنسن پاکستانی لڑکے کی مبینہ محبت میں 2024 کے اختتام پر پاکستان پہنچیں تھی اور چند ماہ تک یہاں رہنے کے بعد فروری کے اختتام یہاں سے امریکا روانہ ہوئی تھیں۔

اونیجا اینڈریو رابنسن کی چند دن قبل امریکا پہنچنے کی ویڈیوز وائرل ہوئی تھیں، جن میں انہیں نیویارک کی گلیوں میں ڈانس کرتے دیکھا گیا۔

اب انہوں نے برطانوی نشریاتی ادارے ’بی بی سی‘ کے ایشین نیٹ ورک کو انٹرویو دیا ہے، جس میں انہوں نے سندھ پولیس کی خاتون پولیس افسر شبانہ جیلانی کے لیے نیک خواہشات کا اظہار کرتے ہوئے ان کی تعریفیں کیں۔

امریکی خاتون کا کہنا تھا کہ شبانہ نہایت ہی اچھی پولیس افسر تھیں، جنہوں نے ان کی خدمت اور دیکھ بھال کی۔

انہوں نے کہا کہ بطور خاتون شبانہ نے ان کی اچھی مہمان نوازی بھی کی، ایک طرح سے وہ اور شبانہ ایک ساتھ کچھ عرصے تک پلی بڑھیں۔

ان کے مطابق انہوں نے صرف شبانہ کو اپنی ٹیم قرار دیا تھا لیکن شبانہ کے ساتھ دوسرے افسر بھی ان کی خدمت پر مامور تھے۔

انہوں نے اعتراف کیا کہ شبانہ جیلانی کو نیویارک بہت پسند ہے اور اگر وہ نیویارک آئیں گی تو وہ ان سے ضرور ملیں گی۔

اونیجا اینڈریو رابنسن نے ایک بار پھر شبانہ جیلانی کے ساتھ پاکستان میں بنائی گئی ویڈیوز کی طرح ان کے لیے محبت کا پیغام بھی دیا۔

انہوں نے روایتی ڈائلاگ بھی بولا کہ وہ شبانہ سے پیار کرتی ہیں۔

خیال رہے کہ اونیجا اینڈریو رابنسن 11 اکتوبر 2024 کو مبینہ طور پر کراچی کے علاقے گارڈن ایسٹ کے رہائشی 19 سالہ ندال احمد میمن کی محبت میں پاکستان پہنچی تھیں، دونوں کے درمیان آن لائن رابطہ تھا، تاہم بعد ازاں لڑکے اور اس کے اہل خانہ نے خاتون سے ملنے سے انکار کردیا تھا۔

خاتون سوشل میڈیا پر اس وقت وائرل ہوئیں، جب جنوری کے آخری عشرے میں جعفریہ ڈزاسٹر سیل مینجمنٹ (جے ڈی سی) کے سربراہ ظفر عباس نے ان سے متعلق ویڈیو سوشل میڈیا پر جاری کرتے ہوئے بتایا تھا کہ خاتون کراچی میں دربدر ہیں اور پھر ان کی ویڈیوز وائرل ہوئیں اور وہ پوری دنیا میں مشہور ہوگئیں۔

پاکستان سے بھیجے جانے سے قبل انہیں کراچی کے جناح ہسپتال کے نفسیاتی وارڈ میں کچھ دن تک زیر علاج بھی رکھا گیا تھا، جہاں خاتون پولیس افسر شبانہ جلبانی ان کی دیکھ بھال پر تعینات تھیں اور ان کے ساتھ بھی امریکی خاتون کی بنوائی گئی ویڈیوز وائرل ہوئی تھیں۔

گزشتہ ہفتے اونیجا اینڈریو رابسن کو نیویارک میں دیکھا گیا، جہاں انہوں نے انٹرویو میں بتایا کہ وہ چار ماہ تک پاکستان میں رہیں، پھر دبئی میں بھی پھنس گئی تھیں اور اب انہوں نے تازہ انٹرویو میں شبانہ جیلانی کی تعریفیں بھی کیں۔