کراچی میں جماعت اسلامی کے تحت شاہراہ فیصل پر غزہ یکجہتی مارچ کے دوران خواتین سمیت بڑی تعداد میں عوام نے شرکت کی۔

غزہ یکجہتی مارچ سے خطاب کرتے ہوئے حافظ نعیم الرحمٰن کا کہنا تھا کہ کراچی نے ایک بار پھر ثابت کیا امت مسلمہ کا جیتا جاگتا شہر ہے، اس وقت اہل غزہ جس مصیبت میں ہیں وہ بیان سے باہر ہے۔

انہوں نے کہا کہ فلسطینیوں کی نسل کشی ہورہی ہے اور اقوام متحدہ قراردادیں پاس کررہا ہے جب کہ اسرائیل حماس سے شکست کھا چکا، اب بچوں سے انتقام لے رہا ہے، انشااللہ فلسطین کو آزادی نصیب ہوگی۔

ان کا کہنا تھا کہ مغرب کے چہرے سے نقاب اتر چکا ہے، ہم امریکا اور اسرائیل کی مذمت کرتے ہیں، ہماری مذمت سے امریکا کے سامنے جھکے ہوئے لوگوں کو تکلیف ہے۔

انہوں نے کہا کہ امریکا میں بھی 50 فیصد لوگ فلسطین کے حامی ہیں، دنیا کا بچہ بچہ اہل غزہ سے اظہار یکجتی کررہا ہے، تمام سیاسی جماعتیں اسرائیل کی مذمت کریں۔

امیر جماعت اسلامی کا کہنا تھا کہ حکمراں بزدلی دکھاتے ہیں کہ معیشت کمزور ہوجائے گی، مطالبہ کیا کہ حکمران اسرائیلی بربریت کے خلاف آواز بلند کریں، وزیراعظم سے کہتا ہوں کہ زبانی باتوں سے کچھ نہیں ہوگا، اجلاس بلائیں۔

حافظ نعیم الرحمان نے 22 اپریل کو فسلطینیوں سے اظہار یکجہتی کے لیے ملک بھر میں شٹرڈاؤن ہڑتال کا اعلان کرتے ہوئے کہا کہ یہ کسی پارٹی کی ہڑتال نہیں ہے بلکہ فلسطینیوں کے لیے آواز ہوگی اور ہم ایک دن اپنا کاروبار بند کریں گے، کشمیر سے گوادر تک سب ہڑتال کرکے بتائیں گے کہ یکجہتی کس کو کہتے ہیں۔