خبر رساں ادارے ’رائٹرز‘ نے اپنی رپورٹ میں ٹیکنالوجی ویب سائٹ ’دی ورج‘ کا حوالہ دیتے ہوئے بتایا کہ اوپن اے آئی کی جانب سے نیا سوشل میڈیا پلیٹ فارم متعارف کرائے جانے کا خیال ابھی ابتدائی مراحل میں ہے۔

رپورٹ میں بتایا گیا کہ اوپن اے آئی کے مالک سام آلٹمین مختلف افراد سے نئے پلیٹ فارم کو متعارف کرانے کے حوالے سے خیالات کا تبادلہ کر رہے ہیں اور ابھی تک پلیٹ فارم کو پیش کرنے کا خیال ابتدائی مراحل میں ہے۔

نئے پلیٹ فارم میں بیک وقت ایلون مسک کے ایکس (سابقہ ٹوئٹر) اور مارک زکربرگ کے انسٹاگرام جیسی خصوصیات شامل ہو سکتی ہیں۔

اوپن اے آئی کی جانب سے نئے سوشل میڈیا پلیٹ فارم کا ابتدائی خاکہ تیار کرلیا گیا ہے، تاہم اسے کیسے پلیٹ فارم میں تبدیل کرکے پیش کیا جائے اس بات کا فیصلہ تاحال حتمی صورت اختیار نہیں کر سکا۔

دی ورج کے مطابق اوپن اے آئی بیک وقت انسٹاگرام اور ایکس جیسی مشترکہ خصوصیات رکھنے والا سوشل میڈیا پلیٹ فارم متعارف کرانے کا ارادہ رکھتی ہے۔

فوری طور پر اوپن اے آئی کمپنی یا اس کے مالک سام آلٹمین نے واضح طور پر سوشل میڈیا پلیٹ فارم کو متعارف کرانے کا حوالے سے کچھ نہیں کہا، تاہم منصوبے سے منسلک متعدد افراد نے تصدیق کی ہے کہ اوپن اے آئی نیا پلیٹ فارم لانے پر کام کر رہی ہے۔

یہاں یہ بات بھی بات یاد رہے کہ پہلے ہی اوپن اے آئی کے مالک کا ایلون مسک سے جھگڑا چل رہا ہے اور دونوں نے ایک دوسرے پر اے آئی کو غلط استعمال کرنے کے الزامات کے تحت عدالتوں میں مقدمات بھی دائر کر رکھے ہیں۔

ساتھ ہی اوپن اے آئی کے مالک کا میٹا کے مالک مارک زکربرگ سے بھی ٹیکنالوجی کے غلط استعمال کرنے کے معاملے پر جھگڑے جاری ہیں۔