ڈان نیوز کے مطابق الیکشن کمیشن نے فیصلے میں کہا ہے کہ پی ٹی آئی انٹرا پارٹی الیکشن کیس کا جوابدہ کو 23 اپریل 2024 کو نوٹس جاری کیا گیا تھا، انٹرا پارٹی الیکشن کیس پہلی مرتبہ گزشتہ سال 30 اپریل کو سماعت کے لیے مقرر کیا گیا تھا۔

فیصلے میں کہا گیا ہے کہ الیکشن کمیشن میں پی ٹی آئی انٹرا پارٹی الیکشن کیس کی اب تک 12 سماعتیں ہو چکی ہیں، پی ٹی آئی کی جانب سے مختلف مواقع پر مختلف وجوہات کی بنا پر کیس کا التوا مانگا گیا، اور پی ٹی آئی کو انصاف کے مفاد کے تحت التوا دیا گیا۔

فیصلے میں کہا گیا ہے کہ پی ٹی آئی نے خود لاہور ہائی کورٹ سے رابطہ کیا اور حکم نامہ حاصل کیا، لاہور ہائی کورٹ کے حکم نامے کو ایک سال ہو چکا ہے، لاہور ہائی کورٹ نے کمیشن کے آگے کارروائی پر حکم امتناع نہیں دیا۔

فیصلے میں مزید کہا گیا ہے کہ الیکشن کمیشن پی ٹی آئی انٹرا پارٹی کیس کی سماعت جاری رکھے گا، اور حتمی فیصلہ درخواست کے نمٹائے جانے کے بعد جاری کرے گا۔

الیکشن کمیشن کے فیصلے میں کہا گیا ہے کہ تمام فریقین اگلی سماعت پر اپنے دلائل مکمل کریں، کیس پر حتمی دلائل اور جوابی دلائل 22 اپریل کو ہوں گے۔