’ابیر گلال‘ کے تمام گانوں کی آڈیو جاری کردی گئی، فلم میں 6 گانے شامل ہیں، جس میں سے دو گانوں کی ویڈیوز بھی جاری کی جا چکی ہیں۔

فلم کے ’خدایا عشق‘ اور ’انگریج رنگ رسیا‘ کی ویڈیوز جاری کی جا چکی ہیں، جنہیں یوٹیوب پر لاکھوں بار دیکھا جا چکا ہے۔

فلم کی میوزک لانچ کی تقریب دبئی کے گلوبل ولیج میں ہوئیں، جہاں فواد خان اور وانی کپور سمیت فلم میں گلوکاری کرنے والے گلوکاروں نے بھی شرکت کی۔

میوزک اور فلم پروموشن کی تقریب میں فواد خان اور وانی کپور نے ’خدایا عشق‘ سمیت دیگر گانوں پر پرفارمنس بھی کی اور دونوں کے ایک ساتھ ڈانس کرنے کی ویڈیوز وائرل ہوگئیں۔

دونوں کو اسٹیج پر فلم کے جاری کیے گئے ٹیزر پر بھی پرفارمنس کرتے دیکھا گیا اور شائقین نے دونوں کی جوڑی کی تعریفیں بھی کیں۔

’ابیر گلال‘ کو آئندہ ماہ 9 مئی کو ریلیز کرنے کا اعلان کیا گیا ہے اور تاحال فلم کا ٹریلر جاری نہیں کیا گیا، البتہ اب تک فلم کے ٹیزر سمیت اس کے دونوں کو جاری کیا جا چکا ہے۔

امکان ظاہر کیا جا رہا ہے کہ رواں ہفتے کے اختتام تک فلم کا ٹریلر جاری کردیا جائے گا، تاہم دوسری جانب بھارتی فلم میں پاکستانی اداکار کو کاسٹ کیے جانے پر بھارتی ہندو انتہاپسند تنظیموں نے دھمکیاں بھی دے رکھی ہیں۔

جہاں انتہاپنسد ہندووں نے دھمکیاں دے رکھی ہیں، وہیں بھارتی اداکاروں نے فواد خان کی بولی وڈ میں واپسی کا دفاع کرتے ہوئے اسے دونوں ممالک کے لیے اچھا بھی قرار دیا ہے۔

ابھی تک یہ واضح نہیں ہو سکا کہ ’ابیر گلال‘ کو پاکستان میں ریلیز کیا جائے گا یا نہیں، تاہم اسے 9 مئی کو بھارت سمیت دیگر ممالک میں پیش کردیا جائے گا۔

مذکورہ فلم کے ذریعے فواد خان تقریبا ایک دہائی بعد بولی وڈ فلموں میں واپسی کریں گے، وہ آخری بار 2016 میں بھارتی فلموں میں دکھائی دیے تھے۔

فواد خان کی بولی وڈ میں واپسی سے وہ پہلے پاکستانی اداکار بھی بن جائیں گے جو کہ تقریبا ایک دہائی بعد ہندی فلم میں نظر آئیں گے۔