پہلگام حملے کے بعد سوشل میڈیا پر ایک ویڈیو تیزی سے وائرل ہورہی ہے جس میں ایک جوڑے کو کشمیر کی وادیوں میں خوشگوار موڈ میں دیکھا جارہا ہے۔

تاہم، ویڈیو کے کیپشن میں یہ دعویٰ کیا گیا ’یہ انڈین بحریہ کے لیفٹیننٹ ونے نروال اور ان کی اہلیہ ہمانشی سوامی کی ویڈیو ہے جو پہلگام میں نامعلوم افراد کی فائرنگ سے چند لمحات پہلے بنائی گئی تھی‘۔

یہ دعویٰ اس وقت غلط ثابت ہوا جو وائرل ویڈیو میں موجود جوڑےآشش سہراوت اور یاشیکا شرما کو مجبوراً ویڈیو ریکارڈ کرنی پڑی جس میں انہوں نے بتایا کہ وہ زندہ ہیں اور یہ اس ویڈیو کو بلاوجہ اس واقعے سے جوڑا جارہا ہے۔

انسٹاگرام پر جاری کی گئی ویڈیو میں یاشیکا شرما کا کہنا تھا کہ ہم خیریت سے ہیں اور ہمیں یہ بات سمجھ نہیں آرہی ہے کہ ہماری ویڈیو کو کیوں اس واقعے سے جوڑا جارہا ہے، انہوں نے صارفین سے اپیل کی کہ جو بھی اس ویڈیو کو دیکھ رہا ہے وہ اسے فوراً رپورٹ کرے کیوں کہ ہماری ویڈیو کا غلط استعمال کیا جارہا ہے۔

ان کا کہنا تھا کہ ہم اس حادثے میں وہاں موجود نہیں تھے لیکن پتہ نہیں کون سی میڈیا نے کہاں سے یہ ویڈیو اٹھائی، ہر نیوز چینل پر وائرل ہورہی ہے، ہمیں نہیں پتا بھارت کی میڈیا کیسے چلتی ہے، لیکن ہم لوگ بہت پریشان ہیں اور ہمارے اہل خانہ اور دوست ابتدائی طور پر یہی سمجھے کہ ہم بھی اس حادثے میں مارے گئے۔

یاشیکا شرما کے ساتھی آشش سہراوت نے ہندوستان ٹائمز سے گفتگو کرتے ہوئے بتایا ’یہ ویڈیو 14 اپریل کو کشمیر میں ہی بنائی تھی جو 22 اپریل یعنی حادثے والے دن اپ لوڈ کی گئی تھی‘۔

ان کا کہنا تھا کہ سوشل میڈیا پر تنقید کے بعد ہم نے یہ ویڈیو ہٹادی تھی اور بعد میں ہمیں پتا چلا کہ اس ویڈیو کا غلط استعمال ہورہا ہے۔

’جب ہندو مصیبت میں پڑتے ہیں تو مسلمان مدد کیلئے دوڑتے ہیں‘

پہلگام میں آنے والی ایک اور سیاح فیملی ہندو مسلم اتحاد کے حق میں بول پڑیں، ان کا کہنا تھا کہ تقریباً 100 لوگوں کے مشکل میں پڑنے کے بعد مقامی شخص عادل نے انہیں پناہ دی اور سب کے لیے کھانے کا بندوبست کیا۔

ان کا مزید کہنا تھا کہ جب ہندو مصیبت میں پڑتے ہیں تو مسلمان مدد کے لیے دوڑتے ہیں۔