راولپنڈی میں کھیلے گئے پی ایس ایل 10 کے میچ میں کوئٹہ گلیڈی ایٹرز نے ریلی روسوو اور حسن نواز کی سینچریوں کی بدولت مقررہ 20 اوورز میں 3 وکٹوں کے نقصان پر 263 رنز بنائے۔

ہدف کے تعاقب میں اسلام آباد یونائیٹڈ کے بلے باز کوئٹہ گلیڈی ایٹرز کے باؤلرز کی نپی تلی باؤلنگ کا سامنا نہ کرسکے اور صرف 4 کھلاڑی ہی ڈبل فیگر میں داخل ہوسکے، پوری ٹیم 3 گیندیں پہلے ہی 154 رنز پر ڈھیر ہوگئی۔

کوئٹہ گلیڈی ایٹرز بیٹنگ

اس سے قبل، اسلام آباد یونائیٹڈ نے کوئٹہ گلیڈی ایٹرز کے خلاف ٹاس جیت کر پہلے فیلڈنگ کرنے کا فیصلہ کیا۔

کوئٹہ گلیڈی ایٹرز کی جانب سے اننگز کا آغاز کرنے والے کپتان سعود شکیل 23 اور فن ایلن 5 رنز بنانے کے بعد پویلین واپس لوٹ گئے۔

جس کے بعد ریلی روسوو اور حسن نواز نے 134 رنز کی بڑی شراکت قائم کی، اس دوران ریلی روسوو نے پی ایس ایل میں اپنی چوتھی سینچری اسکور کی، وہ 46 گیندوں پر 104 رنز بنانے کے بعد آؤٹ ہوئے، ان کی اننگز میں 6 چھکے اور 14 چوکے شامل تھے۔

حسن نواز نے اننگز کی آخری گیند پر چوکا لگاکر پی ایس ایل میں اپنی پہلی سینچری مکمل کی، وہ 9 چھکوں اور 4 چوکوں کی مدد سے 45 گیندوں پر 100 رنز بناکر ناٹ آؤٹ رہے۔

اسلام آباد یونائیٹڈ بیٹنگ

ہدف کے تعاقب میں اسلام آباد کو پہلے ہی اوور میں دچھکا لگا جب محمد عامر نے ان فارم بلے باز صاحبزادہ فرحان کو ایک اور کائل میئرز کو صفر پر پویلین بھیج دیا جب کہ کپتان سلمان علی آغا بھی 6 رنز بنانے کے بعد محمد عامر کا شکار بنے۔

اسلام آباد کی جانب سے عماد وسیم ٹاپ اسکورر رہے جو 56 رنز بنانے میں کامیاب رہے، بین ڈوارشئیس 31 رنز بنانے میں کامیاب رہے، محمد شہزاد نے 24 اور محمد نواز نے 10 رنز بنائے۔ اعظم خان اور حیدر علی 6،6 رنز بناسکے جب کہ جیسن ہولڈر 3 رنز پر آؤٹ ہوئے۔

کوئٹہ کی جانب سے محمد عامر نے 3، محمد وسیم اور ابرار احمد نے 2،2 جب کہ خرم شہزاد، سعود شکیل اور فہیم اشرف نے ایک ایک وکٹ حاصل کی۔

اسلام آباد یونائیٹڈ کے مستقل کپتان شاداب خان آج بھی ٹیم کو دستیاب نہیں تھے جس کے باعث سلمان علی آغا ٹیم کی قیادت کررہے ہیں۔

ٹاس کے وقت سلمان علی آغا کا کہنا تھا کہ شاداب خان اب بھی مکمل فٹ نہیں ہیں تاہم امید ہے وہ اگلے میچ میں ٹیم کو دستیاب ہوں گے۔

اسلام آباد نے ٹیم میں دو تبدیلیاں کی ہیں، سلمان ارشاد کو ڈراپ کیا گیا ہے اور کولن منرو بیماری کی وجہ سے دستیاب نہیں ہیں۔

کوئٹہ گلیڈی ایٹرز کے کپتان سعود شکیل نے کہا کہ وہ ٹاس جیت کر فیلڈنگ کا فیصلہ ہی کرتے کیوں کہ جب آپ کو ایک ہدف ملتا ہے تو آپ کو معلوم ہوتا ہے کس طرح بیٹنگ کرنی ہے اور ویسے بھی یہ باؤلنگ وکٹ لگ رہی ہے۔