پیر کے روز اسحٰق ڈار 3 روزہ سرکاری دورے پر چین کے دارالحکومت بیجنگ پہنچے تھے، وہ یہ دورہ چینی وزیر خارجہ وانگ ژی کی دعوت پر کر رہے ہیں، جو کہ خطے میں کشیدگی کے تناظر میں کافی اہمیت رکھتا ہے۔

یہ سہ فریقی فورم 2017 میں قائم کیا گیا تھا اور اس کے پہلے اجلاس بیجنگ اور افغان دارالحکومت میں منعقد ہوئے تھے۔

چین نے منگل کے روز کہا تھا کہ وہ پاکستان کی ’قومی خودمختاری اور علاقائی سالمیت‘ کے دفاع میں اس کا ساتھ دیتا رہے گا، یہ بیان بھارت کے ساتھ مقبوضہ کشمیر میں ایک ہلاکت خیز حملے کے بعد چار روزہ جھڑپوں کے خاتمے پر جنگ بندی کے بعد سامنے آیا۔

دفتر خارجہ کی جانب سے جاری بیان میں کہا گیا ہے کہ نائب وزیر اعظم اور وزیر خارجہ سینیٹر محمد اسحٰق ڈار، چینی کمیونسٹ پارٹی کے سیاسی بیورو کے رکن اور عوامی جمہوریہ چین کے وزیر خارجہ وانگ ژی، اور افغانستان کے قائم مقام وزیر خارجہ امیر خان متقی نے آج بیجنگ میں ایک غیر رسمی سہ فریقی ملاقات کی۔

دفتر خارجہ نے مزید کہا کہ ’انہوں نے بیلٹ اینڈ روڈ انیشی ایٹو (بی آر آئی) کے تحت تعاون کو مزید گہرا کرنے اور سی پیک کو افغانستان تک توسیع دینے پر اتفاق کیا۔

بیان میں کہا گیا کہ تینوں وزرائے خارجہ نے علاقائی سلامتی اور معاشی روابط کو فروغ دینے کے لیے سہ فریقی تعاون کو ایک اہم پلیٹ فارم کے طور پر تسلیم کیا۔

دفتر خارجہ کے مطابق اس بات پر اتفاق کیا گیا کہ چھٹی سہ فریقی وزرائے خارجہ کی ملاقات کابل میں ابتدائی اور باہمی طور پر موزوں تاریخ پر ہوگی۔

وزرائے خارجہ نے سفارتی روابط بڑھانے، مواصلات کو مضبوط بنانے، تجارت، بنیادی ڈھانچے اور ترقی کو مشترکہ خوشحالی کے اہم عوامل کے طور پر فروغ دینے کے لیے عملی اقدامات پر تبادلہ خیال کیا۔

سہ فریقی وزرائے خارجہ نے دہشت گردی کے خلاف عزم، اور خطے میں استحکام اور ترقی کو فروغ دینے کے اپنے مشترکہ عزم کا اعادہ کیا۔

اس مہینے کے شروع میں افغان وزارت داخلہ کی جانب سے جاری کردہ ایک بیان میں کہا گیا تھا کہ اطالبان کی افغان حکومت پاکستان اور چین کے ساتھ ’باہمی احترام اور تعمیری روابط‘ کی خواہش رکھتی ہے۔

یہ بیان اس وقت جاری کیا گیا تھا جب پاکستان اور چین کے خصوصی نمائندوں محمد صادق اور یوئے شیاؤیونگ، نے کابل میں افغان وزیر داخلہ سراج الدین حقانی سے ملاقات کی تھی۔

بھارتی اخبار ’دی ہندو‘ کے مطابق 15 مئی کو بھارتی وزیر خارجہ ایس جے شنکر نے افغان قائم مقام وزیر خارجہ امیر خان متقی سے ٹیلی فونک گفتگو کی تھی، جو طالبان انتظامیہ سے بھارت کی وزیر سطح کی پہلی رابطہ کاری تھی۔