سرکاری ٹیلی ویژن پی ٹی وی کی رپورٹ کے مطابق وفاقی وزیر آبی وسائل میاں محمد معین وٹو نے پروجیکٹ کا دورہ کیا۔

بریفنگ میں بتایا گیا کہ ریور ڈائی ورشن اور ڈیم فاؤنڈیشن سمیت دیگر اہم اہداف حاصل کر لیے گئے، ڈیم کی تکمیل 28-2027 میں شیڈول ہے اور اس وقت 14 مختلف سائٹس پر کام جاری ہے، جن میں ڈائی ورشن سسٹم، اِن ٹیک ٹنل، سپل ویز اور پاور ہاؤس شامل ہیں۔

اعلامیے کے مطابق 213 میٹر بلند مہمند ڈیم دنیا کا پانچواں بڑا کنکریٹ فیسڈ راک فل ڈیم (سی ایف آر ڈی) ڈیم ہے، اس ڈیم میں پانی ذخیرہ کرنے کی صلاحیت 1.29 ملین ایکڑ فٹ ہے، جس کی بدولت 18 ہزار ایکڑ سے زائد نئی اراضی سیراب ہو گی۔

ان کا کہنا تھا کہ ڈیم سے پشاور کو یومیہ 300 ملین گیلن پینے کا پانی فراہم ہو گا، جبکہ مہمند ہائیڈرو پاور پروجیکٹ سے سالانہ 2 ارب 86 کروڑ یونٹ بجلی پیدا ہو گی۔