علی ظفر شینا زبان میں گانے کو جاری کرنے سے قبل پشتو، بلوچی، سندھی اور سرائیکی زبان میں بھی گانے ریلیز کر چکے ہیں۔

علی ظفر نے پاکستان میں بولی جانے والی مقامی زبانوں میں گانے ریلیز کرنے کے سلسلے کے تحت اپنا پانچواں گانا شینا زبان میں جاری کیا۔

’کرے کرے‘ کو علی ظفر کے ہمراہ شینا زبان کے گلوکار سلمان پارس نے مل کر گایا ہے جب کہ گانے کی ویڈیو میں گلگت بلتستان کی ثقافت اور خوبصورتی کو بھی دکھایا گیا ہے۔

گانے کی ویڈیو میں علی ظفر بھی گلگت بلتستان کی ثقافت کے رنگ میں رنگے نظر آتے ہیں جب کہ ویڈیو میں وہاں کے خوبصورت نظارے بھی محسور کن ہیں۔

علی ظفر نے ملک کی مختلف مقامی زبانوں میں گانے ریلیز کرنے کا سلسلہ 2019 میں شروع کیا تھا اور انہوں نے سب سے پہلے بلوچی، بعد ازاں، سندھی، پھر پشتو اور آخری بار سرائیکی زبان میں گانا ریلیز کیا تھا۔

علی ظفر نے اکتوبر 2019 میں ’لیلیٰ او لیلیٰ‘ نومبر 2020 ’الے، ماروئڑا‘ ستمبر 2021 میں ’لارشہ پیخور‘ اور اپریل 2024 میں ’بالو بتیاں‘ ریلیز کیا تھا اور اب جون 2025 میں انہوں نے شینا زبان میں ’کرے کرے‘ ریلیز کردیا۔