ٹیکنالوجی ویب سائٹ کے مطابق گوگل کا نیا آڈیو فیچر صارفین کو کسی بھی تلاش کا مختصر اور آسان خلاصہ آواز کی صورت میں سننے کی سہولت فراہم کرتا ہے، یعنی اب صارفین کو لمبے لمبے آرٹیکلز پڑھنے کی ضرورت نہیں پڑے گی، بلکہ گوگل اُن کے سوال کا جواب اپنی آواز میں سُنا دے گا۔

اس فیچر کو استعمال کرنے کے لیے جب صارفین گوگل پر کوئی سوال لکھیں گے اور اگر اس تلاش پر یہ سہولت دستیاب ہوئی، تو ایک آڈیو پلیئر نظر آئے گا، صارف پلے کا بٹن دبائیں گے تو گوگل خودکار طور پر تیار کیا گیا خلاصہ سنادے گا۔

یہ خلاصہ گوگل کے جدید ترین اے آئی ماڈل ’جیمینائی‘ کے ذریعے تیار کیا جاتا ہے، جو مختلف ویب سائٹس اور معتبر ذرائع سے معلومات حاصل کرکے ایک جامع اور سادہ انداز میں خلاصہ پیش کرتا ہے۔

یہ فیچر خاص طور پر ان افراد کے لیے مفید ہے، جو زیادہ پڑھ نہیں سکتے یا پڑھنا مشکل محسوس کرتے ہیں، جو چلتے پھرتے، سفر میں یا مصروف وقت میں معلومات لینا چاہتے ہیں یا جو کسی بھی موضوع کو مختصر اور آسان زبان میں سمجھنا چاہتے ہیں۔

گوگل کا یہ فیچر فی الحال صرف اس کے تجرباتی ’سرچ لیبز‘ صارفین کے لیے دستیاب ہے، لیکن امید کی جارہی ہے کہ جلد ہی یہ تمام صارفین کے لیے بھی مہیا کردیا جائے گا۔