حنا خواجہ بیات نے حال ہی میں ندا یاسر کے مارننگ شو میں شرکت کی، جس میں دیگر شخصیات بھی شریک ہوئیں،جنہوں نے نئی نسل کی بدلتی ترجیحات اور رویوں پر کھل کر بات کی۔

پروگرام کے دوران بات کرتے ہوئے حنا خواجہ بیات کا کہنا تھا کہ نو عمری میں لڑکے اور لڑکی کے درمیان دوستی اور تعلقات عام بات ہیں لیکن یہ دیکھنے کی ضرورت ہے کہ وہ تعلقات اور دوستی کس نوعیت کی ہے؟

ان کے مطابق لڑکے اور لڑکی کے رویے اور باتوں سے معلوم ہوجاتا ہے کہ ان کے درمیان کس طرح کے تعلقات اور دوستی ہے لیکن دونوں میں بطور انسان صرف دستی اچھی بات ہے۔

اداکارہ کا کہنا تھا کہ آج کل کے دور میں چیزیں اور رویے تیزی سے تبدیل ہو رہے ہیں، والدین کو اپنے بچوں پر خصوصی نظر رکھنے کی ضرورت ہے، انہیں دیکھنا چاہیے کہ بچے کہاں، کس کے ساتھ اور کیوں جا رہے ہیں؟

انہوں نے یہ بھی کہا کہ اگر کسی لڑکی اور لڑکے کی منگنی ہوئی ہے اور دونوں کو لگ رہا ہے کہ کچھ چیزیں ایسی ہیں، جنہیں چھپایا جا رہا ہے، تو مذکورہ معاملے پر مزید تفتیش کی جانی چاہیے۔

ایک موقع پر حنا خواجہ بیات نے مسکراتے ہوئے کہا کہ اگر نوجوانی میں لڑکا جنس مخالف یعنی لڑکی جانب راغب ہے تو یہ ایک طرح سے اچھی بات بھی ہے، کیوں کہ آج کل بہت ساری چیزیں تبدیل ہو رہی ہیں۔

انہوں نے اسی بات پر کہا کہ خدا ہم سب کو اپنی حفظ و امان میں رکھے اور ہمیں اپنے گناہوں کی معافی دے لیکن سماج میں تیزی سے ہم جنس پرستی کا رجحان فروغ پا رہا ہے۔

حنا خواجہ بیات کے مطابق آج کل کے دور میں مرد اپنی ہی جنس مردوں کی جانب جب کہ عورتیں بھی عورتوں کی جانب راغب ہو رہی ہیں اور یہ تیزی سے ہو رہا ہے۔

اداکارہ کا کہنا تھا کہ ایسے معاملات ہونے کے باجود ہمیں پتا نہیں چلتا اور اس وقت بات کا علم ہوتا ہے جب معاملہ انتہائی بڑھ چکا ہے، شادیاں اور بچے ہو چکے ہوتے ہیں۔

حنا خواجہ بیات کی بات کی ویڈیو وائرل ہوگئی اور صارفین نے ان کی بات سے اتفاق بھی کیا اور کہا کہ والدین کو بچوں کو سخت نظر رکھنی چاہیے۔