حال ہی میں توقیر ناصر نے ’سنو ٹی وی‘ کے ایک پروگرام میں شرکت کی، جہاں انہوں نے مختلف معاملات پر کھل کر بات کی۔

پروگرام میں گفتگو کرتے ہوئے توقیر ناصر نے بتایا کہ وہ وحید مراد کو دیکھ کر اداکاری کی طرف آئے، شروعات میں خاندان اس کے خلاف تھا، لیکن بعد میں والد نے اجازت دے دی۔

اداکار نے یہ بھی کہا کہ ان کی اداکاری وحید مراد سے کافی مختلف ہے، انہوں نے کبھی وحید مراد کی نقل نہیں کی کیونکہ وحید مراد رومانوی کرداروں کے حوالے سے جانے جاتے تھے، جب کہ وہ خود جارحانہ کرداروں کے لیے مشہور ہوئے۔

توقیر ناصر نے اس بات سے بھی اتفاق کیا کہ آج کے نوجوان اداکار اپنے سینئرز کا احترام نہیں کرتے۔

انہوں نے بتایا کہ ان کے دور میں جب کوئی سینئر آتا تھا تو سب لوگ ان کے احترام میں کھڑے ہو جاتے تھے، نئے اداکاروں اور سینئر فنکاروں کے درمیان باہمی احترام ہوا کرتا تھا، جب کہ آج کل وہ احترام ختم ہو چکا ہے۔

توقیر ناصر کے مطابق وہ قوی خان صاحب کے لیے کھڑے ہو جاتے تھے اور یہ ڈر کے باعث نہیں بلکہ عزت کے باعث ہوتا تھا، جب کہ آج کی نوجوان نسل میں یہ جذبہ نظر نہیں آتا۔

ایک سوال کے جواب میں انہوں نے کہا کہ آج کل کی اداکاراؤں میں سجل علی اور ہانیہ عامر بہترین اور باصلاحیت اداکارائیں ہیں، لیکن ان کے کیریئر میں جو کمی ہے، وہ اچھے ہدایتکاروں کی ہے۔

توقیر ناصر کا کہنا تھا کہ آج کل کے ہدایتکار زیادہ تر اسکرین پر توجہ دیتے ہیں، وہ اداکار کو نکھارتے نہیں، نہ ہی انہیں کچھ سکھاتے ہیں، اس رویے کا اثر سجل اور ہانیہ جیسی باصلاحیت اداکاراؤں کے کیریئر پر پڑتا ہے۔