آرمی چیف فیلڈ مارشل عاصم منیر پی این ایس رہبر میں پاک بحریہ کی پاسنگ آؤٹ پریڈ سے خطاب میں کہا کہ دوست ملک کے کیڈٹس کو مبارکباد دیتے ہیں ، میری ٹائم واریئرز کی شاندار پاسنگ آؤٹ پریڈ کا معائنہ کرنا اعزاز ہے۔

ان کا کہنا تھا کہ خطے میں پاک بحریہ کے لیے میری ٹائم وار فیئر کے چینلج مسلسل بڑھ رہے ہیں، بحری جنگ کے میدان میں تبدیلی سے ہمیں ہم آہنگ ہونا ہوگا، پاکستان کے لیے مضبوط اور مؤثر میری ٹائم فورس برقرار رکھنا ناگزیر ہے۔

فیلڈ مارشل نے کہا کہ پاکستان کی ترقی کا سفر جاری رہے گا، ترقی کے لیے عوام، حکومت اور افواج کے درمیان مضبوط تعلق ناگزیر ہے جب کہ دہشت گردی کے خلاف جنگ کو منطقی انجام تک پہنچائیں گے۔

آرمی چیف نے کہا کہ معرکہ حق بھارت کی یادداشت سے کبھی ختم نہیں ہوگا اور ہم کسی بھی قیمت پر اپنی دھرتی کے تحفظ کے لیے تیار ہیں جب کہ مسلح افواج کے بھارت کو پرعزم جواب سے قومی وقار مضبوط ہوا۔

انہوں نے کہا کہ بھارت نے غیر ذمہ دارانہ جارحیت کا ارتکاب کیا جس سے پورے خطے کو خطرہ تھا، بھارتی اشتعال انگیزی کے باوجود صبرو تحمل اور ذمہ داری کا مظاہرہ کیا، دراصل بھارت جعلی اسٹریٹجک اہمیت سے سیاسی فوائد حاصل کرنا چاہتا ہے۔

فیلڈ مارشل عاصم منیر کا کہنا تھا کہ ہمارا دشمن متکبرانہ اور جارحانہ رویے کا مسلسل مظاہرہ کررہا ہے، چند برسوں میں بھارت نے 2 بار پاکستان پر بلاوجہ حملے کیے اور پاکستان نے دونوں بار بھرپور اور مؤثر جواب سے خطے کو بڑے تنازع سے بچایا۔

انہوں نے کہا کہ اگر دشمن سمجھتا ہے کہ پاکستان خود مختاری پر حملے برداشت کرے گا تو یہ ایک خطرناک غلط فہمی ہوگی، آج پاکستان خطے میں ’نیٹ ریجنل سٹیبلائزر‘ کے طور پر جانا جاتا ہے۔

آرمی چیف کا کہنا تھا کہ مقبوضہ جموں کشمیر کے شہدا کو خراج عقیدت پیش کرتا ہوں پاکستان کشمیریوں کی سیاسی ، سفارتی اور اخلاقی حمایت جاری رکھے گا۔

ان کا مزید کہنا تھا کہ کشمیر کے تنازع کو ختم نہیں بلکہ حل کرنا ہوگا، خطے میں مستحکم امن مسئلہ کشمیر کے حل کے بغیر ناممکن ہے، جو یہ سمجھتے ہیں کہ کشمیریوں کی امنگوں کو دباسکتا ہے وہ غلطی پر ہیں اور حق خودارادیت کے حصول میں کشمیری عوام کے ساتھ ہیں۔

اس سے قبل، کراچی میں پاک بحریہ کے 123ویں مڈ شپ مین اور 31ویں شارٹ سروس کمیشن کورس کی کمیشننگ پریڈ کی تقریب میں آرمی چیف فیلڈ مارشل سید عاصم منیر بطور مہمان خصوصی شریک ہوئے۔

پاکستان نیول اکیڈمی پی این ایس رہبر میں فیلڈ مارشل عاصم منیر کو پاک بحریہ کےچاق و چوبند دستے نے سلامی دی، فیلڈ مارشل عاصم منیر نے پریڈ کا معائنہ کیا۔

فیلڈ مارشل عاصم منیر نے 123ویں مڈ شپ مین اور 31ویں شارٹ سروس کمیشن کورس میں نمایاں کارکردگی دکھانے والے کیڈٹس میں انعامات بھی تقسیم کیے، تقریب میں پاک بحریہ کے اعلیٰ افسران بھی شریک ہوئے۔

پاک فوج کے سربراہ فیلڈ مارشل سید عاصم منیر پاکستان نیول اکیڈمی پی این ایس رہبر، کراچی میں پاک بحریہ کے کیڈٹس کی پاسنگ آؤٹ پریڈ میں مہمان خصوصی کی حیثیت سے شریک ہوئے، تقریب میں اہم شخصیات کے علاوہ غیر ملکی سفارت کار بھی شریک تھے۔

پاسنگ آؤٹ پریڈ میں فارغ التحصیل کیڈٹس سے ذمہ داریوں کا حلف لیا گیا، تقریب میں مہمان خصوصی فیلڈ جنرل مارشل عاصم منیر نے نمایاں کارکردگی دکھانے والے کیڈٹس کو انعامات سے نوازا۔

فیلڈ مارشل سید عاصم منیر نے پاس آؤٹ ہونے والے کیڈٹ عبدالرحمٰن کو اعزازی شمشیر سے نوازا۔