تیونس کی رہائشی سندا ایاری کی کھڈا مارکیٹ لیاری کے رہائشی محمد عامر سے سوشل میڈیا پر دوستی ہوئی، جو بعد ازاں محبت میں تبدیل ہو گئی۔

دونوں نے شادی کا فیصلہ کیا، جس کے لیے سندا نے پاکستانی ویزا حاصل کیا اور 28 نومبر 2024 کو کراچی پہنچی۔

شادی کے ابتدائی چند ماہ تک دونوں کے تعلقات خوشگوار رہے، لیکن بعد ازاں معمولی باتوں پر تلخیاں شروع ہوئیں، میاں بیوی کے درمیان جھگڑے کے بعد عامر نے شادی کے سات ماہ بعد اسے طلاق دے دی اور ایک ریسٹورنٹ پر چھوڑ کر چلا گیا۔

طلاق کے بعد سندا کا پاکستان میں قیام مشکل ہو گیا کیونکہ اس کا 90 روزہ ویزا 18 فروری کو ختم ہو چکا تھا، وطن واپسی کا کوئی راستہ نہ ہونے کے باعث وہ شدید ذہنی دباؤ کا شکار ہو گئی اور لیاری میں خودکشی کی کوشش بھی کی۔

بے یار و مددگار سندا ایاری کو ویمن پولیس لیاقت آباد نے کارروائی کرتے ہوئے تیونس کے سفارتخانے کے حوالے کیا، جس کے بعد اسے اسلام آباد منتقل کر دیا گیا۔

پولیس کے مطابق، سندا نے کسی قسم کے تشدد یا زیادتی کی کوئی باضابطہ شکایت درج نہیں کرائی۔

حکام کا کہنا ہے کہ ایڈیشنل آئی جی کی ہدایت پر سندا کو سفارتی عملے کے حوالے کیا گیا اور تیونس کے سفارتخانے کی معاونت سے اسے کراچی سے اسلام آباد منتقل کیا گیا، جہاں سے اس کی وطن واپسی کے لیے اقدامات جاری ہیں۔