ڈان نیوز کے مطابق ملک شاہزین چند دن قبل پنجاب کے دارالحکومت لاہور سے سندھ کے دارالحکومت کراچی کے لیے مسافر طیارے میں بیٹھے لیکن طیارہ انہیں کراچی کے بجائے جدہ لے گیا۔

حیران کن طور پر نجی ایئر لائن کا عملہ پاسپورٹ اور ویزا کے بغیر ہی مسافر کو لاہور سے جدہ لے گیا۔

نجی ایئرلائن کمپنی کے ترجمان نے اپنی غلطی کا اعتراف کرتے ہوئے بتایا کہ عملے کی غلطی کی وجہ سے کراچی کے مسافر کو جدہ لے جایا گیا۔

متاثرہ مسافر کے سامنے آنے کے بعد ایئرپورٹ انظامیہ نے واقعے کا نوٹس لیتے ہوئے معاملے کی تفتیش شروع کردی۔

دوسری جانب متاثرہ مسافر نے نجی ٹی وی کے مارننگ شو میں بتایا کہ ان کے ساتھ واقعہ 7 جولائی کو پیش آیا، وہ لاہور ایئرپورٹ سے کراچی کے لیے طیارے میں سوار ہوئے۔

ان کے مطابق مقامی پروازوں والی جگہ پر ہی نجی ایئر لائن کی بین الاقوامی پرواز بھی موجود تھی اور ان کے پوچھے جانے پر عملے نے انہیں ملکی کے بجائے بین الاقوامی پرواز کی جانب بھیج دیا اور طیارے میں داخل ہوتے وقت ایئرہوسٹس نے ان کا ٹکٹ دیکھ کر انہیں اپنی سیٹ بھی بتائی۔

مسافر کا کہنا تھا کہ انہوں نے طیارے میں احرام میں ملبوس مسافر دیکھے لیکن انہوں نے سوچا کہ شاید کنیکٹڈ فلائٹ ہو، عمرے پر جانے والوں کو شاید کراچی سے سعودیہ بھیجا جائے گا۔

مسافر نے بتایا کہ جب انہیں دوران پرواز دو گھنٹے سے زائد کا دورانیہ گزرا تو انہوں نے ایئرلائن عملے سے پوچھا، جس پر عملہ بھی حیران ہوگیا اور عملے کے ارکان کو اپنی غلطی کا احساس ہوگیا۔

مسافر کے مطابق جدہ پہنچنے کے بعد انہوں نے طیارے سے اترنے سے انکار کیا، جس کے بعد ایئرلائن انہیں واپس لاہور لے آئی، جس کے بعد وہ نیا ٹکٹ خرید کر کراچی پہنچے۔