ڈان نیوز کے مطابق صدر آل پاکستان انجمن تاجران اجمل بلوچ کا ایک بیان میں کہنا تھا کہ ایف بی آر قوانین کے خلاف 26 جولائی کو ملک کے کونے کونے ہر ضلع و تحصیل میں احتجاج ہوگا۔

انہوں نے کہا کہ سیل ٹیکس ایکٹ کی شق 37 (اے اے)، 37 (بی)، 21 (ایس) فوری طور پر واپس لی جائیں، اسی طرح 21 ایس کیش ٹرانزیکشن پر 20 فیصد ٹیکس کسی صورت نہیں مانتے۔

اجمل بلوچ کا مزید کہنا تھا کہ 25 صفحات پر مبنی انکم ٹیکس گوشوارہ بھی قبول نہیں، ڈیجیٹل انوائسنگ تاجر پر بوجھ اور کرپشن کی نئی راہ کھولے گی، ڈیجیٹل انوائسنگ کرپشن کے علاوہ 6 لاکھ روپے سالانہ اضافی بوجھ بھی پڑے گا۔

صدر آل پاکستان انجمن تاجران نے مزید کہا کہ کاروباری طبقے کی تذلیل کسی صورت برداشت نہیں کریں گے، 16 لاکھ سے زائد کاروباری لوگ ملک چھوڑ چکے ہیں۔

اجمل بلوچ کا کہنا تھا کہ سیل ٹیکس کے بے ہودہ قوانین مشکلات کے سوا کچھ نہیں، پوائنٹ آف سیل ڈیوائس ایک منتھلی کرپشن فارمولا ہے، ٹیکس وصولی کا آدھا کرپشن کی نظر ہو رہا ہے۔

انہوں نے کہا کہ تاجر برادری میں مزید ٹیکس ادا کرنے کی سکت بالکل نہیں، مفت پیٹرول ، بجلی گیس اور مراعات فوری ختم کی جائیں۔

اجمل بلوچ کا کہنا تھا کہ وزیروں مشیروں کی بڑھائی گئی تنخواہیں واپس کی جائیں، ابھی بھی وقت ہے اسٹیک ہولڈرز کے ساتھ بیٹھ کر بات کر لی جائے۔