بلال مقصود نے پاکستانی بچوں کے لیے خصوصی گانوں اور خاکوں پر مشتمل ’پکے دوست‘ کے تیسرے سیزن کی ریلیز کی تیاری شروع کر دی ہے اور انہوں نے والدین سے اپیل کی ہے کہ وہ اپنے بچوں کو یہ سیریز ضرور دکھائیں۔

انسٹاگرام پر جاری کردہ ویڈیو پیغام میں اسٹرنگز بینڈ کے سابق مرکزی رکن بلال مقصود نے ’پکے دوست‘ کے لیے اپنی گہری وابستگی ظاہر کی اور بتایا کہ بینڈ کے اختتام کے بعد بچوں کا یہ شو ان کی زندگی کا مقصد بن چکا ہے۔

ان کے مطابق ’پکے دوست‘ ایک ایسا شو ہے جس کے ذریعے وہ بچوں کو اردو زبان کے قریب لانا چاہتے ہیں، وہ چاہتے ہیں کہ بچے اردو بولنے میں شرمندگی نہ محسوس کریں، بلکہ فخر اور خوشی سے اردو بولیں۔

بلال مقصود نے کہا کہ اب صرف بچے ہی نہیں بلکہ ان کے والدین بھی اردو سے دور ہو رہے ہیں اور زیادہ تر لوگ انگریزی کو اہم سمجھنے لگے ہیں، وہ اس سوچ کو بدلنا چاہتے ہیں تاکہ اردو پھر سے مقبول اور پسندیدہ زبان بن جائے۔

انہوں نے پاکستانی بچوں پر غیر ملکی میڈیا کے غلبے پر تشویش کا اظہار کیا اور کہا کہ برسوں سے جو مواد بچے دیکھ رہے ہیں، وہ پاکستانی اقدار سے بالکل مختلف ہے، غیر ملکی مواد کی تفصیلات ہمارے کنٹرول میں نہیں ہوتیں اور وہ بچوں میں کون سی اقدار پیدا کر رہا ہے، یہ بھی ہمارے ہاتھ میں نہیں ہوتا۔

اسٹرنگز کے اختتام کے بعد بلال مقصود نے اپنی توجہ بچوں کے لیے اردو میں معیاری اوریجنل مواد بنانے پر مرکوز کر دی ہے، وہ اسے ایک ایسا شعبہ سمجھتے ہیں جو پاکستانی میڈیا میں طویل عرصے سے نظر انداز کیا گیا ہے۔

انہوں نے کہا کہ اب یہ میں ہوں، ’پکے دوست‘ ان کی نئی پہچان ہے اور اب ان کی زندگی کا مقصد بچوں کے لیے معیاری مواد بنانا ہے۔

’پکے دوست‘ کے ہر سیزن میں گانے، موسیقی کے سیشن اور مختلف پپٹ کردار شامل ہوتے ہیں، جن کا مقصد بچوں کو تفریح کے ساتھ ساتھ تعلیم دینا اور انہیں زبان و ثقافت سے جوڑے رکھنا ہے۔

بلال مقصود نے کہا کہ ہر سیزن میں 13 سے 14 گانے شامل ہوتے ہیں اور اسٹرنگز کے ساتھ 33 سالہ موسیقی کا جو تجربہ ہے، وہ سب کچھ وہ اس شو میں شامل کر رہے ہیں۔

انہوں نے تسلیم کیا کہ آج کے دور میں بچوں کو اسکرین سے دور رکھنا ممکن نہیں، لیکن والدین چاہیں تو انہیں ایسا مواد دکھا سکتے ہیں جو مقامی اقدار اور روایات سے ہم آہنگ ہو۔

بلال مقصود کے مطابق ہم بچوں کی اسکرین ٹائم پر مکمل پابندی نہیں لگا سکتے، نہ ہی ان کے فون یا ٹیبلٹ بند کر سکتے ہیں، لیکن یہ ضرور دیکھ سکتے ہیں کہ وہ کیا دیکھ رہے ہیں اور امید ہے کہ وہ ایسا مواد ہو جو ہماری شناخت سے میل کھاتا ہو۔

اپنے پیغام کے آخر میں بلال مقصود نے اپنے پرانے مداحوں سے اپیل کی کہ جس طرح انہوں نے موسیقی کے سفر میں ان کا ساتھ دیا، اسی طرح اگر وہ اس مشن میں بھی ان کا ساتھ دیں اور اپنے اردگرد کے بچوں کو ’پکے دوست‘ دیکھنے کا کہیں تو انہیں بے حد خوشی ہوگی۔