ڈان نیوز کے مطابق لاہور سے راولپنڈی جانے والی اسلام آباد ایکسپریس کی بوگیاں کالا شاہ کاکو کے قریب پٹڑی سے اتر گئیں، جس کے نتیجے میں 29 مسافر زخمی ہوئے۔

حادثے کے بعد ٹریک پر ٹرینوں کی آمدورفت معطل ہوگئی، اور گرین لائن اور ریل کاروں سمیت متعدد ریل گاڑیاں روک دی گئیں۔

وزیرریلوے حنیف عباسی نے اسلام آباد ایکسپریس حادثے کا نوٹس لیتے ہوئے چیف ایگزیکٹیو آفیسر (سی ای او) ریلوے اور ڈویژنل سپرنٹنڈنٹ (ڈی ایس) ریلوے کو جائے حادثہ پر پہنچنے کی ہدایت کردی۔

حنیف عباسی نے ریلوے کے عملے کو امدادی کاموں کو تیز کرنے اور طبی عملے کو فوراً موقع پر پہنچنے کی ہدایت بھی کی ہے۔

وزیر ریلوے نے حادثے کی انکوائری کا حکم جاری کرتے ہوئے 7 روز میں رپورٹ پیش کرنے کی ہدایت کردی۔

دوسری جانب حادثے کے باعث راولپنڈی اور لاہور سے آنے جانے والی ٹرینوں کا روٹ عارضی طور پر تبدیل کردیا گیا ہے۔

ریلوے حکام کا کہنا ہے کہ ٹریک کلیئر ہونے تک ٹرینیں براستہ وزیر آباد، سانگلہ ہل، حافظ آباد، شاہدرہ لاہور پہنچیں گی۔

ریلوے حکام نے بتایا ہے کہ اسلام آباد ایکسپریس ٹرین حادثے کے بعد گرین لائن ایکسپریس سادھوکی سے روانہ کردی گئی ہے۔

دریں اثنا، وزیراعظم شہباز شریف نے اسلام آباد ایکسپریس حادثے پر اظہار افسوس کرتے ہوئے ریسکیو ٹیموں کو آپریشن تیز کرنے کی ہدایت کی۔

وزیراعظم نے زخمیوں کو فوری طور پر طبی امداد فراہم کرنے کی ہدایت کرتے ہوئے زخمیوں کی جلد صحتیابی کی دعا کی ہے۔