حنا آفریدی نے حال ہی میں سینئر صحافی و یوٹیوبر عنبرین فاطمہ کو دیے گئے ایک انٹرویو میں مختلف موضوعات پر کھل کر بات کی۔

ان کا کہنا تھا کہ فیصل قریشی بہت ہی پروفیشنل اداکار ہیں، وہ ملک کے نامور فنکار ہیں لیکن اس کے باوجود بہت اچھے طریقے سے پیش آتے ہیں اور سیٹ پر ہمیشہ وقت پر پہنچتے ہیں۔

انہوں نے کہا کہ وہ ڈراما ’راجا رانی‘ میں فیصل قریشی کے ساتھ کام کرتے ہوئے بہت گھبرا رہی تھیں کہ کہیں کسی غلطی پر ڈانٹ نہ دیں، لیکن فیصل قریشی نے بہت آرام سے ان سے بات کی اور شوٹنگ کے دوران بھرپور ساتھ دیا۔

حنا آفریدی نے کہا کہ انہیں لگتا ہے کہ فہد مصطفیٰ کے ساتھ ان کی آن اسکرین کیمسٹری بہت اچھی لگے گی اور لوگ ان کی جوڑی کو پسند بھی کریں گے۔

اداکارہ کا کہنا تھا کہ وہ اپنے چہرے پر بالکل بھی میک اپ نہیں کرتیں کیونکہ انہیں لگتا ہے کہ وہ میک اپ سے عمر میں دس سال بڑی لگتی ہیں۔

ان کے خیال میں انہیں میک اپ کی ضرورت نہیں کیونکہ ان کے چہرے پر ڈارک سرکلز یا ایسی کوئی چیز نہیں ہے جسے میک اپ سے چھپانا پڑے، اسی لیے وہ میک اپ کرنے کو ترجیح نہیں دیتیں۔

حنا آفریدی کے مطابق ڈراما ’راجا رانی‘ میں انہوں نے سوائے ٹنٹ کے کچھ بھی نہیں لگایا اور وہ صاف چہرے کے ساتھ اداکاری کر رہی ہیں۔

واضح رہے کہ حنا آفریدی اور فیصل قریشی کا ڈراما ’راجا رانی‘ ہم ٹی وی پر نشر ہو رہا ہے، جسے ناظرین کی جانب سے بھرپور پذیرائی حاصل ہو رہی ہے۔