ڈان نیوز کے مطابق سلمان اکرم راجا کا کہنا تھا کہ آج ایک ایسا واقعہ ہوا ہے، جو اب مجھ سے دو ٹوک فیصلے کا تقاضا کرتا ہے، میری زندگی کھلی کتاب ہے، میرا کوئی عمل کسی اصول سے متصادم نہیں۔

انہوں نے کہا کہ فکری و معاشی دیانت پر سمجھوتہ مجھے قبول نہیں، کل میں عمران خان سے گزارش کر کے عہدے سے علیحدہ ہو جاؤں گا، میری وکالتی خدمات بلامعاوضہ حاضر رہیں گی۔

تاہم، پی ٹی آئی کے سیکریٹری جنرل سلمان اکرم راجا نے یہ نہیں بتایا کہ وہ کون سا واقعہ ہے، جس نے انہیں عہدہ چھوڑنے کا فیصلہ کرنے پر مجبور کیا۔

سلمان اکرم راجا کا مزید کہنا تھا کہ پچھلے منگل میں نے علی بخاری ایڈووکیٹ کے ذریعے عمران خان صاحب کو درخواست بھیجی تھی کہ پارٹی ممبران کو بے تحاشہ ناحق سزاؤں کے پیش نظر مجھے سیکریٹری جنرل کے عہدے سے ہٹ کر قانونی معاملات پر توجہ مرکوز کرنے دی جائے۔

انہوں نے کہا کہ بانی پی ٹی آئی عمران خان نے میری درخواست منظور نہیں کی۔

ان کا مزید کہنا تھا کہ میں کوئی روایتی سیاست دان نہیں، نہ جاگیردار نہ مل اونر، تاہم میرا مختصر خاندان میرے ساتھ کھڑا ہے۔

انہوں نے ہم نے پارٹی کے اندر اور باہر سے ہر قسم کے رکیک حملوں کو سہا ہے، کوئی ملال نہیں، اپنی بھرپور وکالت کو پس پشت ڈال کر معاشی بے یقینی کو بخوشی قبول کیا۔

واضح رہے کہ اس سے قبل نومبر 2024 میں پی ٹی آئی کے سیکریٹری جنرل سلمان اکرم راجا نے عہدے سے استعفی دینے کا اعلان کیا تھا۔

ذرائع نے بتایا تھا کہ پی ٹی آئی احتجاج کے بعد مسلسل تنقید کے بعد سلمان اکرم راجا نے عہدے سے استعفی دیا تھا۔

مزید بتایا تھا کہ سلمان اکرم راجا کو لاہور سے قافلہ لے کر اسلام آباد جانے کی ذمہ داری سونپی گئی تھی، راستے بند ہونے کے بعد سلمان اکرم راجا کی جانب سے لاہور میں ہی احتجاج کا پلان بنایا گیا تھا۔

ذرائع کا کہنا تھا کہ سلمان اکرم راجا لاہور میں بھی ورکرز کو نکالنے میں ناکام رہے تھے۔