سماجی رابطے کی ویب سائٹ ’ایکس‘ پر اپنے پیغام میں حماد اظہر نے اپنے والد اور سابق گورنر پنجاب میاں محمد اظہر کے انتقال کے باعث خالی ہونے والی نشست این اے - 129 سے ضمنی انتخاب نہ لڑنے کا اعلان کر دیا۔

ان کا کہنا تھا کہ میرا فارم 47 والی پارلیمنٹ کا حصہ بننے کا کوئی ارادہ نہیں، جو جعلی اراکین سے بھری ہوئی ہے۔

پی ٹی آئی رہنما نے کہا کہ پچھلی بار جب میرے 82 سالہ والد نے الیکشن لڑا تھا تو انہیں پولیس نے ہراساں کیا، انہیں گرفتار کیا گیا اور گھر پر بار بار توڑ پھوڑ کی گئی۔

ان کا مزید کہنا تھا کہ خاندان کے اکلوتے بیٹے اور واحد مرد وارث ہونے کے ناطے وہ نہیں چاہتے کہ ان کی ماں ایک اور صدمے سے گزریں۔

حماد اظہر نے بتایا کہ والدہ کی ہدایت پر انہوں نے اپنے کزن چوہدری ارسلان ظہیر کو اپنی جگہ الیکشن لڑنے کے لیے نامزد کیا ہے، اگر پارٹی میرے حلقے میں الیکشن کے بائیکاٹ کا فیصلہ نہیں کرتی تو وہ جانشین ہوں گے۔

دوسری جانب، مسلم لیگ (ن) کے صدر نواز شریف این اے 129 کے انتخابی معرکہ کے حوالے سے متحرک ہو گئے ہیں اور انہوں نے سیاسی دھڑوں کے اتحاد کی ذمہ داری خواجہ سعد رفیق کو سونپ دی۔