ڈان نیوز کے مطابق چیئرمین پاکستان پیپلز پارٹی بلاول بھٹو زرداری نے پنجاب میں سیلاب سےجاں بحق افرادکے ورثا سے اظہار افسوس کرتے ہوئے کہا ہے کہ مون سون کے نئے سلسلے کے آغاز پر سیلاب کی صورتحال مزید دشوار ہو سکتی ہے، ہمیں ہر طرح کے حالات کے لیے تیار رہنا ہوگا۔

بلاول بھٹو زرداری نے ریسکیو آپریشنز میں مصروف رضاکاروں اور پاک فوج کےجوانوں کےحوصلوں کو بھی سراہا اور کہا کہ قوم ہرقسم کی تقسیم کو بالائے طاق رکھ کربحران کا مقابلہ کرنے کے لیے متحد ہو جائے۔

انہوں نے مزید کہا کہ ہم نے بطور قوم پہلے بھی بحرانوں کا مقابلہ کیا ہے، اتحاد کی طاقت سے ہم اس بار بھی سرخرو ہوں گے، پیپلزپارٹی کارکنان اور عہدیداران سیلاب سے متاثرہ افرادکی آگے بڑھ کر مدد کریں۔