کیریبین پریمیئر لیگ کے ویسٹ انڈیز میں دلچسپ اور سنسنی خیز مقابلوں کا سلسلہ جاری ہے تاہم تاروبا میں کھیلے جانے والے ٹرینباگو نائٹ رائیڈر اور سینٹ کیٹس اینڈ نیوس پیٹریاٹس کے درمیان میچ میں کرکٹ فینز اُس وقت حیران رہ گئے، جب جارحانہ بلے بازی کے لیے مشہور کیرون پولارڈ نے 8 گیندوں پر 7 چھکے لگا دیئے۔

ٹرینباگو نائٹ رائیڈر کی نمائندگی کرنے والےکیرون پولارڈ نے میچ کے 15ویں اوور کی دوسری گیند پر اسپنر ناوین بیدائسی کا سامنا کیا، جسے ناوین ’بیٹ‘ کروانے میں کامیاب رہے۔

اگلی 2 گیندوں پر کیرون پولارڈ نے ناوین بیدائسی کو شاندار چھکے لگائے، اوور کی 5ویں گیند پر کوئی رن نہ بن سکا، تاہم آخری گیند پر کیرون پولارڈ اسپن باؤلر کو ایک اور چھکا رسید کرنے میں کامیاب رہے۔

16 ویں اوور کی ابتدائی 2 گیندیں پولارڈ کے ساتھی نیکولس پورن نے کھیلیں، تیسری گیند پر کیرون پولارڈ کا سامنا اسپنر وقار سلیمان خیل سے ہوا تو جارحانہ بیٹر نے فورا ہی گیند کو باؤنڈری سے باہر بھیج دیا، اوور کی چوتھی، پانچویں اور چھٹی بال پر بھی بالترتیب کیرون پولارڈ نے مزید 3 چھکے لگائے۔

جارحانہ بلے بازی کے لیے مشہور کیرون پولارڈ نے 8 گیندوں پر 7 چھکے لگائے، دائیں ہاتھ سے بیٹنگ کرنے والے بیٹر نے 29 گیندوں پر 65 رنز کی دھواں دھار اننگز کھیل کر اپنی ٹیم کی جیت میں بھی اہم کردار ادا کیا۔