دبئی انٹرنیشنل کرکٹ اسٹیڈیم میں کھیلے گئے دلچسپ میچ میں بھارت نے پاکستان کا 147 رنز کا ہدف 5 وکٹوں کے نقصان پر 2 گیندیں قبل ہی حاصل کرلیا۔

بھارت کے مڈل آرڈر بیٹر تلک ورما نے 10 کے مجموعے پر 2 وکٹیں گرنے کے بعد پہلے سنجو سیمسن اور پھر شیوم دھوبے کے ساتھ زمہ دارانہ پارٹنر شپ قائم کیں، بائیں ہاتھ سے بلے بازی کرنے والے بیٹر نے ناقابل شکست رہتے ہوئے 69 رنز بناکر اپنی ٹیم کو ایشین چیمپئن بنوانے میں اہم کردار ادا کیا۔

تلک ورما نے اپنی شاندار اننگز کے دوران 3 چوکے اور 4 چھکے بھی لگائے۔

شیوم دھوبے نے 33 اور سنجو سیمسن نے 24 رنز کی اننگز کھیل کر بھارتی ٹیم کے لیے جیت کی راہ ہموار کی۔

اوپنر بیٹر ابھیشک شرما 5، شبمن گل اور کپتان سوریا کمار یادو ایک، ایک رن بنا کر آؤٹ ہوئے۔

پاکستان کے فاسٹ باؤلر فہیم اشرف 3 وکٹیں حاصل کر کے نمایاں رہے، ابرار احمد اور شاہین شاہ آفریدی نے ایک، ایک کھلاڑی کو آؤٹ کیا۔

فاسٹ باؤلر حارث رؤف سب سے مہنگے باؤلر ثابت ہوئے، انہوں نے 3.4 اوور میں 50 رنز دیئے اور کوئی وکٹ حاصل نہ کر سکے۔

اس سے قبل، پاکستان کی پوری ٹیم 19.1 اوورز میں 146 رنز بنا کر آل آؤٹ ہوئی، اوپنر بلے باز صاحب زادہ فرحان اور فخر زمان کے علاوہ کوئی بھی بیٹر بھارتی باؤلرز کا جم کر مقابلہ نہ کر سکا۔ 10ویں اوور میں 84 رنز پر پہلی وکٹ گرنے کے بعد پاکستان بیٹرز بھارتی باؤلرز کے سامنے ریت کی دیوار ثابت ہوئے۔

ٹاپ آرڈر بیٹر صاحبزادہ فرحان شاندار 57 رنز کی اننگز کھیل کر آؤٹ ہوئے، انہوں نے 35 گیندوں پر 5 چوکوں اور 3 چھکوں کی مدد سے ففٹی مکمل کی۔

صائم ایوب ایک بار پھر لمبی اننگز کھیلنے میں ناکام رہے، ٹاپ آرڈر بیٹر 11 گیندوں پر 14 رنز بنا کر کلدیپ یادو کا شکار بنے جب کہ وکٹ کیپر بیٹر محمد حارث بغیر کھاتہ کھولے پویلین واپس لوٹ گئے۔

اوپنر بلے باز فخر زمان 35 گیندوں پر 46 رنز بنا کر کیچ آؤٹ ہوئے، انہوں نے 2 چوکے اور 2 چھکے بھی لگائے، حسین طلعت ایک رن جبکہ کپتان سلمان علی آغا 8 رنز بنا کر آؤٹ ہوئے۔

فہیم اشرف اور شاہین آفریدی کھاتہ کھولے بغیر پویلین لوٹ گئے، حارث رؤف 6 رنز بنا کر کلین بولڈ ہوئے، محمد نواز 9 گیندوں پر 6 رنز بناکر آؤٹ ہوئے۔

بھارتی اسپنر کلدیپ یادو نے 30 رنز دے کر 4 وکٹیں اپنے نام کیں، اکثر پٹیل، وارون چکراورتی اور جسپریت بمراہ نے 2،2 وکٹیں اپنے نام کیں۔

فائنل میچ میں بھارتی ٹیم کے آل راؤنڈر ہاردیک پانڈیا انجری کے باعث پاکستان کے خلاف میچ سے باہر ہو گئے، رنکو سنگھ کو متبادل کے طور پر ٹیم میں شامل کیا گیا۔

پاکستان کی پلیئنگ الیون میں کوئی تبدیلی نہیں کی گئی جب کہ بھارتی ٹیم سے ارشدیپ سنگھ اور ہرشیت رانا کو ڈراپ کر دیا گیا جب کہ فاسٹ باؤلر جسپریت بمراہ اور شیوم دھوبے کی واپسی ہوئی۔

پاکستان کی پلیئنگ الیون

قومی اسکواڈ کی قیادت سلمان علی آغا کر رہے ہیں، دیگر کھلاڑیوں میں فخرزمان، صاحب زادہ فرحان، صائم ایوب، محمد حارث شامل ہیں، محمد نواز، حسین طلعت، فہیم اشرف، شاہین شاہ آفریدی، حارث رؤف اور ابرار احمد بھی فائنل الیون میں شامل ہیں۔

بھارت کی پلیئنگ الیون

بھارتی ٹیم کی قیادت سوریا کمار یادو کر رہے ہیں، دیگر کھلاڑیوں میں ابھیشک شرما، شبمن گِل، تلک ورما، سنجو سیمسن، شیوم دھوبے، رنکو سنگھ، اکثر پٹیل، کلدیپ یادو، جسپریت بمراہ اور وارون چکراورتی شامل ہیں۔