راولپنڈی کرکٹ اسٹیڈیم میں کھیلے گئے میچ میں 195رنز کے تعاقب میں پاکستان ٹیم 19ویں اوور میں 139رنز پر ڈھیر ہو گئی، پاکستان کی جانب سے صائم ایوب نے 37 اور صاحبزادہ فرحان نے 24 رنز بنائے۔

بابر اعظم صفر پر آؤٹ ہوئے، جبکہ کپتان سلمان علی آغا 2 اور حسن نواز 3 رنز بناسکے۔

قبل ازیں، پاکستان نے ٹاس جیت کر پروٹیز کو کھیلنے کی دعوت دی۔

مہمان ٹیم نے مقررہ 20 اوورز میں 9 وکٹوں کے نقصان پر 194 رنز بنائے، ریزا ہنڈریکس نے شاندار 40 گیندوں پر 60 رنز کی اننگز کھیلی، جارج لنڈے 36 اور ٹونی ڈی زورزی 16 گیندوں پر برق رفتار 33 بنا کر نمایاں رہے۔

پاکستان کی جانب سے محمد نواز نے 26 رنز دے کر 3 کھلاڑیوں کو آؤٹ کیا، صائم ایوب نے 2 شکار کیے۔

فاسٹ باؤلر شاہین شاہ آفریدی، نسیم شاہ اور ابرار احمد نے ایک، ایک وکٹ حاصل کی۔

اس سے قبل، ٹاس کے موقع پر قومی ٹیم کے کپتان سلمان علی آغا نے کہا کہ ٹیم سے اچھی کارکردگی کی امید ہے، بابر اعظم اور نسیم شاہ نے ماضی میں کئی شاندار پرفارمنسز دیں اور پاکستان کو میچز جتوانے میں اہم کردار ادا کیا۔

انہوں نے کہا کہ دونوں کھلاڑی کی ٹیم میں واپسی سے اسکواڈ مضبوط ہوا ہے، ٹیم میں کچھ تبدیلیاں ہوئیں، کچھ کھلاڑیوں کا کم بیک ہوا ہے۔

جنوبی افریقی کپتان ڈیونون فریرا نے کہا کہ اگر ہم بھی ٹاس جیت جاتے تو پہلے فیلڈنگ کرنے کو ہی ترجیح دیتے۔

پاکستان کی پلیئنگ الیون

سلمان علی آغا کی قیادت میں صائم ایوب، صاحب زادہ فرحان، بابراعظم اور عثمان خان ٹیم میں شامل ہیں، حسن نواز، محمد نواز، فہیم اشرف، شاہین شاہ آفریدی، نسیم شاہ اور ابرار احمد بھی پلیئنگ الیون کا حصہ ہیں۔