جیو نیوز کے پروگرام ’کیپٹل ٹاک‘ میں گفتگو کرتے ہوئے بیرسٹر گوہر علی خان نے کہا کہ اگر افغانستان نے کسی قسم کی جارحیت دکھائی تو پاکستان کو حق دفاع حاصل ہے، ہمارے پاس صلاحیت اور وسائل، دونوں موجود ہیں۔

انہوں نے کہا کہ جیسے ہم بھارت کیخلاف جنگ میں پاکستان کے ساتھ کھڑے تھے، اگر ایسی صورتحال دوبارہ ہوئی تو افغانستان ہمارے لیے زیادہ مختلف نہیں۔

چیئرمین پی ٹی آئی کا کہنا تھا کہ پاکستان کے بہترین مفاد میں یہ ہے کہ ہم اپنے پڑوسی ممالک کے ساتھ پر امن حالات میں رہیں، تاہم، افغانستان کا معاملہ کشیدہ ہے، افغان طالبان کی پورے ملک میں رِٹ قائم نہیں ہے۔

بیرسٹر گوہر علی خان نے مزید کہا کہ شاہد ترکیہ میں ہونے والے مذاکرات کامیاب نہیں ہو سکیں گے، ہمیں دوبارہ مذاکرات کے لیے کوشش کرنی چاہیے جب تک یہ معاملہ حل نہیں ہو جاتا، دوست ممالک کو ساتھ ملا کر افغان طالبان کو سمجھانا چاہیے۔

افغان طالبان کے اسلام آباد پر حملوں کے حوالے سے بیانات پر میزبان نے جب چیئرمین پی ٹی آئی سے پوچھا کہ افغان رہنماؤں کے ان خیالات پر آپ کی کیا رائے ہے تو انہوں نے کہا کہ اگر افغان طالبان اسلام آباد پر حملے کی باتیں کرتے ہیں، تو ہم اس کی بھی مذمت کرتے ہیں، اقوام متحدہ کے چارٹر کے تحت پاکستان کے پاس اپنے دفاع کا حق موجود ہے، کوشش کرنی چاہیے کہ اس معاملے کو افہام تفہیم سے حل کر لیں۔