مسلم لیگ ن کے سربراہ پارلیمانی پارٹی کی میٹنگ کی صدارت کر رہے ہیں۔ فائل فوٹو اے پی پی

اسلام آباد: ملک کے نئے وزیر اعظم کے انتخاب سے ایک روز قبل ڈان نیوز کو وفاقی کابینہ کے متوقع وزرا کی فہرست موصول ہو گئی ہے۔

فہرست کے مطابق مسلم لیگ ن کے سینئر رہنماؤں اسحاق ڈار، چوہدری نثار، احسن اقبال، خرم دستگیر اور شاہد خاقان عباسی جبکہ مسلم لیگ فنکشنل لیگ کے صدرالدین راشدی کو اہم وزارتیں دیے جانے کا امکان ہے۔

ڈان کو موصول شدہ لسٹ کے مطابق مندرجہ ذیل رہنماؤں کو اہم وزارتیں دیے جانے کا امکان ہے۔

اسحاق ڈار کو وزارت خزانہ، چوہدری نثار کو وزارت داخلہ، پرویز رشید کو وزارت اطلاعات، خرم دستگیر کو تجارت، مرتضیٰ جتوئی کو سمند پار پاکستانی، احسن اقبال کو وزارت انفارمیشن ٹیکنالوجی، زاہد حامد کو وزارت قانون، وزارت پیٹرولیم اور قدرتی وسائل کا قلمدان شاہد خاقان عباسی، وزارت ترقیات کے لیے صدر الدین راشدی، سردار یوسف وزیر برائے غذائی تحفظ اور کامران مائیکل کو وزارت اقلیتی امور۔

اسی طرح طارق فضل چوہدری، انوشا رحمان اور سائرہ افضل کے نام بھی وفاقی وزرا کی فہرست میں موجود ہیں جبکہ طارق فاطمی کو وزارت خارجہ کے مشیر کا قلمدان سونپا جائے گا۔

فہرست کے مطابق جمعیت علمائے اسلام اور پختونخوا ملی عوامی پارٹی کو بھی ایک ایک وزارت دی جائے گی۔